Border News Agency
အမေရိကန်၊ မေ ၆။
ဟော်မုဇ်ရေလက်ကြားမှာပိတ်မိနေတဲ့ သင်္ဘောတွေကိုကူညီပေးမယ့် Project Freedomစစ်ဆင်ရေးကို သမ္မတထရမ့်က ခေတ္တရပ်ဆိုင်းလိုက်တယ်လို့ Reuters သတင်းမှာ ဖော်ပြထားပါတယ်။
အမေရိကန်နိုင်ငံခြားရေးဝန်ကြီး Marco Rubio က ဒီအစီအစဉ်ကို မေလ ၄ ရက်နေ့မှာ စတင်ခဲ့တာဖြစ်ပါတယ်။
အဲဒီစစ်ဆင်ရေးဟာ ရေလက်ကြားမှာသောင်တင်နေပြီး ရိက္ခာနဲ့အရေးပေါ်ပစ္စည်းတွေလိုအပ်နေတဲ့ ရေယာဉ်တွေအတွက် လူသားချင်းစာနာမှုအကူအညီပေးဖို့ ရည်ရွယ်ခဲ့တာပါ။
ဒါပေမယ့် အီရန်နဲ့အမေရိကန်ကြားတိုက်ခိုက်မှုတွေ ပြန်လည်ဖြစ်ပွားလာတာကြောင့် မေလ ၅ ရက်နေ့မှာတော့ အစီအစဉ်ကို ပြန်လည်ရပ်ဆိုင်းလိုက်ရပါတယ်။
ကမ္ဘာ့ရေနံထောက်ပံ့မှုရဲ့ ၂၀ ရာခိုင်နှုန်းခန့်စီးဆင်းရာ ဟော်မုဇ်ရေလက်ကြားကို ပဋိပက္ခတွေကြောင့်ပိတ်ထားခဲ့ရတာဟာ ကမ္ဘာလုံးဆိုင်ရာစွမ်းအင်အကျပ်အတည်းကိုဖြစ်ပေါ်စေခဲ့ပါတယ်။
ဒီပြဿနာကိုဖြေရှင်းဖို့အတွက် သမ္မတထရမ့်ကအခုလိုအကူအညီပေးမယ့် အစီအစဉ်ကိုကြိုးပမ်းခဲ့တာလည်း ဖြစ်ပါတယ်။
အခုလိုစစ်ဆင်ရေးကို ရပ်ဆိုင်းလိုက်တာဟာ ရေလက်ကြားအတွင်းစစ်ရေးတင်းမာမှုတွေ ပိုမိုမြင့်တက်လာနိုင်ခြေရှိသလို ပိတ်မိနေတဲ့သင်္ဘောသားတွေနဲ့ သင်္ဘောတွေအတွက်လည်း ပိုမိုစိုးရိမ်စရာအခြေအနေဖြစ်လာစေပါတယ်။
အမေရိကန်နဲ့ အီရန်ကြား ငြိမ်းချမ်းရေးဆွေးနွေးမှုတွေရှိနေတယ်ဆိုပေမယ့် မြေပြင်မှာတော့တိုက်ခိုက်မှုတွေရှိနေဆဲဖြစ်တာကြောင့် ဟော်မုဇ်ရေလက်ကြား ပြန်လည်ပွင့်နိုင်မယ့် အရေးဟာမရေမရာဖြစ်နေဆဲဖြစ်ပါတယ်။
