Border News Agency
သြစတြေးလျ၊ မေ ၆။
ဒေါ်အောင်ဆန်းစုကြည်ကို နေအိမ်အကျယ်ချုပ် ပြောင်းရွှေ့လိုက်တယ်ဆိုတဲ့ သတင်းတွေနဲ့ပတ်သက်ပြီး သူမကိုမိသားစု၊ရှေ့နေတွေနဲ့တွေ့ဆုံခွင့်ပေးဖို့အပြင် လိုအပ်တဲ့ ကျန်းမာရေးစောင့်ရှောက်မှုတွေ ရရှိစေဖို့ မျှော်လင့်တယ်လို့ မြန်မာနိုင်ငံဆိုင်ရာ သြစတြေးလျသံရုံးက မေလ ၆ ရက်၊ဒီနေ့မှာထုတ်ပြန်ပါတယ်။
ဒေါ်အောင်ဆန်းစုကြည်နဲ့တကွ မတရားသဖြင့် ဖမ်းဆီးထိန်းသိမ်းခံထားရသူ အားလုံးကို ခြွင်းချက်မရှိ ပြန်လည်လွှတ်ပေးဖို့ဆက်လက်တောင်းဆိုနေပြီး ဒါဟာမြန်မာ့နိုင်ငံရေး အကျပ်အတည်းအတွက် အရေးကြီးတဲ့ အချက်ဖြစ်တယ်လို့ ဆိုပါတယ်။
ဒါ့အပြင် မြန်မာနိုင်ငံအတွင်း အကြမ်းဖက်မှုတွေ အမြန်ဆုံး ရပ်တန့်ဖို့နဲ့ ဒုက္ခသည်တွေအတွက် လူသားချင်းစာနာမှု အကူအညီတွေကို အဟန့်အတားမရှိ လုံလုံခြုံခြုံ ပေးအပ်နိုင်ခွင့် ရှိရမယ်လို့လည်းဆိုပါတယ်။
ခုလက်ရှိ ပဋိပက္ခတွေကို ဖြေရှင်းနိုင်ဖို့အတွက် သက်ဆိုင်သူတွေအားလုံး ပါဝင်တဲ့ တွေ့ဆုံဆွေးနွေးမှုတွေကို လုပ်ဆောင်သွားဖို့ကိုလည်း အော်စတြေးလျဘက်က ထပ်လောင်းတောင်းဆိုထားပါတယ်။
ဒေါ်အောင်ဆန်းစုကြည်ကို နေအိမ်အကျယ်ချုပ် ပြောင်းရွှေ့ပေးတာဟာ နိုင်ငံတကာရဲ့ ဖိအားတွေကြောင့် ဖြစ်နိုင်သလိုသူမရဲ့ လက်ရှိကျန်းမာရေး အခြေအနေအပေါ်မှာလည်း ကမ္ဘာ့နိုင်ငံတွေက အထူးစိုးရိမ် စောင့်ကြည့်နေကြပါတယ်။
