Border News Agency
ယူကေ၊ မေ ၆။
ဒေါ်အောင်ဆန်းစုကြည်ကို အကျဉ်းထောင်ကနေ နေအိမ်အကျယ်ချုပ်ဆီ ပြောင်းရွှေ့လိုက်တာကိုပထမဆုံးခြေလှမ်းတခုအနေနဲ့ ကြိုဆိုပေမယ့် ဒါဟာ ခြွင်းချက်မရှိ ပြန်လွှတ်ပေးဖို့အထိဖြစ်သင့်တယ်လို့ ယူကေနိုင်ငံ၊ အင်ဒို-ပစိဖိတ်ရေးရာဝန်ကြီး Seema Malhotra က ပြောကြားလိုက်ပါတယ်။
ဝန်ကြီး Seema Malhotra က ဒေါ်အောင်ဆန်းစုကြည်ကို နေအိမ်အကျယ်ချုပ် ပြောင်းရွှေ့ပေးတာဟာ ကောင်းမွန်တဲ့အချက် ဖြစ်ပေမယ့် ဒီလုပ်ဆောင်ချက်ဟာ သူမကို လုံးဝပြန်လွှတ်ပေးမယ့် လမ်းကြောင်းပေါ်က ခြေလှမ်းတခု ဖြစ်ရမယ်လို့ ဆိုပါတယ်။
ဒါ့အပြင် ဒေါ်အောင်ဆန်းစုကြည်ရဲ့ ကျန်းမာရေးနဲ့ ပတ်သက်ပြီး ယူကေအစိုးရအနေနဲ့ စိုးရိမ်ပူပန်နေဆဲဖြစ်ပြီး သူမရဲ့ လက်ရှိအခြေအနေကို အမြန်ဆုံး အတည်ပြုချက်ရဖို့ စောင့်မျှော်နေတယ်လို့လည်းဆိုပါတယ်။
ဒေါ်အောင်ဆန်းစုကြည်သာမက မြန်မာနိုင်ငံအတွင်း မတရားဖမ်းဆီးထိန်းသိမ်းခံထားရသူ အားလုံးကိုလည်း အမြန်ဆုံး ပြန်လည်လွှတ်ပေးဖို့ကိုလည်း ဝန်ကြီးက ထပ်မံတောင်းဆိုခဲ့ပါတယ်။
အာဏာသိမ်းစစ်တပ်ကက ဒေါ်အောင်ဆန်းစုကြည်ကို နေအိမ်အကျယ်ချုပ် ပြောင်းရွှေ့လိုက်တယ်ဆိုတဲ့ သတင်းတွေ ထွက်ပေါ်နေပေမယ့် သူမရဲ့ ကျန်းမာရေးနဲ့ တိကျတဲ့ တည်နေရာကိုတော့ နိုင်ငံတကာက စောင့်ကြည့်နေကြပါတယ်။
