Border News Agency
အီရန် မေ ၂၇။
တောင်ပိုင်းအီရန်နိုင်ငံထဲမှာ မိုင်းထောင်ဖို့ ကြိုးစားနေတဲ့ အီရန်လှေတွေနဲ့ ဒုံးကျည်ပစ်လွှတ်တဲ့နေရာအချို့ကို အမေရိကန်စစ်တပ်က မေလ ၂၅ ရက်နေ့မှာ လေကြောင်းကနေ ကြားဖြတ်ဗုံးကြဲတိုက်ခိုက်ခဲ့ပါတယ်။
အမေရိကန် ဗဟိုစစ်ဌာနချုပ် (CENTCOM) ရဲ့ ထုတ်ပြန်ချက်အရအခုတိုက်ခိုက်မှုဟာ အီရန်တပ်ဖွဲ့တွေရဲ့ ရန်ပြုမယ့်အန္တရာယ်ကနေ အမေရိကန်စစ်သည်တွေကို ကာကွယ်ဖို့အတွက် ကိုယ်ပိုင်ခုခံပိုင်ခွင့်အရ ကာကွယ်ရေးလုပ်ငန်းစဉ်တစ်ခုအနေနဲ့ လုပ်ဆောင်ခဲ့တာလို့ ဆိုပါတယ်။
အမေရိကန်နဲ့ အီရန်ကြား အပစ်အခတ်ရပ်စဲရေးသဘောတူညီချက်တခု ရှိနေဆဲဖြစ်ပြီး အမေရိကန်ဗဟိုစစ်ဌာနချုပ် အနေနဲ့အဲဒီအပစ်ရပ်ကာလအတွင်းမှာ အတတ်နိုင်ဆုံး ထိန်းထိန်းသိမ်းသိမ်း လုပ်ဆောင်ရင်းမိမိတို့တပ်ဖွဲ့တွေကို ဆက်လက်ကာကွယ်သွားမယ်လို့ ဗဟိုစစ်ဌာနချုပ် ပြောရေးဆိုခွင့်ရှိသူ ရေတပ်ဗိုလ်မှူးကြီး တင်မ်ဟော့ကင်းစ်က ပြောထားပါတယ်။
ဒီတိုက်ခိုက်မှုဟာ လက်ရှိဖြစ်ပွားနေတဲ့ အမေရိကန်-အီရန် စစ်ပွဲအတွင်းမှာ အပစ်ရပ်ထားပေမယ့်လည်း နှစ်ဖက်စစ်ရေးတင်းမာမှုတွေ ဆက်ရှိနေသေးတာကို ပြသနေပြီး၊ အသေးစိတ် ထိခိုက်ပျက်စီးမှု အခြေအနေတွေကိုတော့ ဝါရှင်တန်ဘက်က အကျယ်တဝင့် ထုတ်ပြန်တာမျိုး မရှိသေးပါဘူး။
