Border News Agency
ဂျပန်၊ဇွန် ၃။
ဂျပန်နိုင်ငံရဲ့ KDDI Corporation နဲ့ Sumitomo Corporation တို့အနေနဲ့ အာဏာသိမ်းစစ်တပ်ရဲ့ ထိန်းချုပ်မှုအောက်မှာရှိတဲ့ MPT နဲ့ တာဝန်မဲ့ပူးပေါင်းဆောင်ရွက်နေတာတွေကို ချက်ချင်းရပ်တန့်ပြီး မြန်မာနိုင်ငံကနေ တာဝန်ယူမှုရှိရှိ ထွက်ခွာသွားဖို့ အရပ်ဖက်အဖွဲ့အစည်းတွေက တောင်းဆိုလိုက်တယ်လို့ Justice For Myanmar က ထုတ်ပြန်ပါတယ်။
KDDI နဲ့ Sumitomo တို့ရဲ့ ပူးပေါင်းဆောင်ရွက်မှုတွေဟာ မြန်မာနိုင်ငံအတွင်း လူ့အခွင့်အရေးဆိုင်ရာ ဆိုးကျိုးသက်ရောက်မှုတွေကို ဖြစ်ပေါ်စေနေတဲ့အပေါ် Justice For Myanmar၊ Mekong Watch နဲ့ ဂျပန်အခြေစိုက် အရပ်ဖက်အဖွဲ့အစည်းရှစ်ဖွဲ့တို့က အလေးအနက် စိုးရိမ်ပူပန််တယ်လို့ဆိုပါတယ်။
MPT ဟာအရပ်သားတွေကို စောင့်ကြည့်ဖို့၊ ဖမ်းဆီးဖို့၊ညှဉ်းပန်းနှိပ်စက်ဖို့နဲ့ သတ်ဖြတ်ဖို့တွေအတွက် အသုံးပြုနေတဲ့ အာဏာသိမ်းစစ်တပ်ရဲ့ ဒစ်ဂျစ်တယ် ထิန်းချုပ်မှုယန္တရားရဲ့ အဓိက အစိတ်အပိုင်းတခုဖြစ်တယ်လို့Justice For Myanmar ပြောရေးဆိုခွင့်ရှိသူ မရတနာမောင်ကပြောပါတယ်။
သူတို့အနေနဲ့ MPT နဲ့ ပူးပေါင်းဆောင်ရွက်မှုကို ချက်ချင်းအဆုံးသတ်ပြီး တာဝန်သိသိ ထွက်ခွာသင့်ပါတယ်” လို့ ပြောကြားခဲ့ပါတယ်။
Mekong Watch ရဲ့ အမှုဆောင်ဒါရိုက်တာ ယူကာ ကီဂူချီကလည်း KDDI နဲ့ Sumitomo တို့အနေနဲ့ ငွေကြေးအရ ဆက်နွှယ်မှုမရှိဘူးလို့ အကြောင်းပြပြီး လူ့အခွင့်အရေး ကာကွယ်စောင့်ရှောက်ရမယ့် တာဝန်တွေကို ရှောင်လွှဲလို့မရဘူးလို့ ဝေဖန်ခဲ့ပါတယ်။
အာဏာသိမ်းစစ်တပ်က လူ့အခွင့်အရေးချိုးဖောက်မှုတွေ ကျူးလွန်နေချိန်မှာ အခုလို ဆက်လက်ပံ့ပိုးပေးနေတာဟာ တာဝန်ဝတ္တရားတွေကို ဖြည့်ဆည်းနေတာလို့ မှတ်ယူလို့ မရနိုင်ဘူးလို့လည်းဆိုပါတယ်။
အဲဒါကြောင့် စီးပွားရေးလုပ်ငန်းတွေကတဆင့် အာဏာသိမ်းစစ်တပ်ရဲ့ လူ့အခွင့်အရေးချိုးဖောက်မှုတွေကို အထောက်အကူပြုတာ ဒါမှမဟုတ် အားပေးတာမျိုးတွေ မဖြစ်စေဖို့အတွက် ကုမ္ပဏီနှစ်ခုအနေနဲ့ တာဝန်ယူမှုရှိရှိ ချက်ချင်းအရေးယူဆောင်ရွက်ကြဖို့ အရပ်ဖက်အဖွဲ့အစည်းတွေကတောင်းဆိုထားကြပါတယ်။
