Border News Agency
ပုဏ္ဏားကျွန်း၊ ဇွန် ၂၈။
အာရက္ခတပ်တော် (AA) ထိန်းချုပ်ထားတဲ့ ပုဏ္ဏားကျွန်းမြို့နယ်မှာ ဇွန်လအတွင်းရေနစ်သေဆုံးသူ ၁၅ ဦးထိရှိခဲ့ပြီး အသက်မပြည့်သေးတဲ့ ကလေးငယ်သုံးဦးပါဝင်ပါတယ်။
အဲဒီပုဏ္ဏားကျွန်းမြို့နယ်၊ ဒိုးတန်းရွာမှာ ဇွန်လ ၁၂ ရက်နေ့က အသက်လေးဆယ်ရှစ်နှစ်အရွယ် ဦးစိုးချေဟာ ဝါးခုတ်ပြီးနတ်သရဲရွာအနီးရှိမြောင်းကို ဖြတ်ကူးရာရေနစ်သေဆုံးခဲ့ပါတယ်။
အဲဒီအပြင် ဇွန်လ ၁၄ ရက်နေ့ကလည်း ဂဏန်းတောင်စစ်ဘေးရှောင်စခန်းမှ အသက်တဆယ့်တနှစ်အရွယ်မအေးနိုင်ဟာ စခန်းအနီးရှိမီးရထားလမ်းဘေးမြောင်းမှာ ရေနစ်သေဆုံးခဲ့ပါတယ်။
နောက်ပြီး ဇွန်လ ၁၅ ရက်နေ့က ပုဏ္ဏားကျွန်းမြို့ကြိုးတံတားကို တိုက်မိပြီးပြည်သူဆယ်ဦးရေနစ်သေဆုံးခဲ့ရပါတယ်။
အဲဒီအပြင် ကျောက်ဆိပ်ရွာမှာ ဇွန်လ ၁၇ ရက်နေ့ကလည်း အသက်တဆယ့်သုံးနှစ်အရွယ်မဝင်းမြတ်သူနဲ့အသက်တဆယ့်နှစ်နှစ်အရွယ်မသန်းအေးနွယ်ဟာ ကုလားတန်မြစ်မှာရေနစ်သေဆုံးခဲ့ပါတယ်။
နောက်ပြီး ဇွန်လ ၂၅ ရက်နေ့ကလည်း ပန်းနီလာစစ်ဘေးရှောင်စခန်းမှ အသက်လေးဆယ်သုံးနှစ်အရွယ် ဦးခင်မောင်ဝင်းဟာ လမ်းဘေးမြောင်းထဲ ရေနစ် သေဆုံးခဲ့ပါတယ်။
အာရက္ခပြည်မှာရေနစ်သေဆုံးမှုတွေဟာ မကြာခဏဖြစ်နေပြီး ပြီးခဲ့တဲ့နှစ် မိုးရာသီကာလကလည်း မြို့နယ်အသီးသီးမှာ ရေနစ်သေဆုံးသူအများအပြားရှိခဲ့ပါတယ်။
အဲဒီလိုဖြစ်စဉ်တွေကြောင့် မိသားစုဝင်တွေဟာ ကလေးငယ်တွေကို မြစ်၊ ချောင်းကမ်းစပ်တွေမှာ အန္တရာယ်မဖြစ်အောင် အရင်ကထက် ပိုဂရုစိုက်ကြဖို့လိုအပ်နေတယ်လို့ ဒေသခံတွေက ဆိုကြပါတယ်။
