Border News Agency
မြောက်ဦး၊ဇူလိုင် ၇။
အာရက္ခဒေသမှာရှိတဲ့ ဆေးရုံ၊ဆေးခန်းတွေအတွက် လိုအပ်တဲ့ ဆေးဝါးပစ္စည်းတွေကို မြန်မာကျပ်ငွေနဲ့ တင်ဒါခေါ်ယူနေပြီလို့ အာရက္ခပြည်သူ့ကျန်းမာရေးဌာနက ဇူလိုင်လ ၆ ရက်၊မနေ့ကထုတ်ပြန်ပါတယ်။
အခုလို တင်ဒါစနစ်နဲ့ ပြောင်းလဲဝယ်ယူတာကြောင့် ဆေးဝါးဈေးနှုန်းတွေ တပြေးညီဖြစ်လာပြီး ပြည်သူတွေအတွက် ဆေးဝါးတွေကို နေရာဒေသမရွေး ပိုမိုသက်သာစွာနဲ့ ရရှိနိုင်တော့မယ်လို့ဆိုပါတယ်။
အဲဒီတင်ဒါလျှောက်လွှာတွေကို ဇွန်လ ၂၂ ရက်ကတည်းက စတင်ရောင်းချနေပြီး စိတ်ဝင်စားတဲ့ လုပ်ငန်းရှင်တွေအနေနဲ့ ဇူလိုင်လ ၂၁ ရက်နောက်ဆုံးထားပြီး လျှောက်လွှာနဲ့ နမူနာပစ္စည်းတွေကို တင်သွင်းရမယ်လို့လည်းဆိုပါတယ်။
အဲဒီ ဆေးဝါးတင်ဒါတင်မကဘဲ အာရက္ခပြည်သူ့ကျန်းမာရေးဌာနဟာ တီဘီ၊ HIV၊ ငှက်ဖျားနဲ့ ကာကွယ်ဆေးတွေကို အခမဲ့ဖြန့်ဝေပေးနေသလို၊ ဆေးရုံ၊ ဆေးခန်းတွေအတွက် လိုအပ်တဲ့ စက်ပစ္စည်းတွေကိုလည်း အားစိုက်ဖြည့်တင်းပေးနေတယ်လို့ဆိုပါတယ်။
ခုလက်ရှိမှာလည်း သွေးလွန်တုပ်ကွေး ကာကွယ်ရေး၊ စစ်ရှောင်တွေအတွက် ကျန်းမာရေးစောင့်ရှောက်မှုနဲ့ ကိုယ်ဝန်ဆောင်မိခင်တွေအတွက် ကျန်းမာရေးလုပ်ငန်းတွေကိုပါလုပ်ဆောင်နေတယ်လို့ ဆိုပါတယ်။
တင်ဒါနဲ့ပတ်သက်တဲ့ စည်းမျဉ်းတွေ၊ လိုအပ်တဲ့ အချက်အလက်တွေကို သက်ဆိုင်ရာ ခရိုင်နဲ့ မြို့နယ်ကျန်းမာရေးဌာနတွေမှာ အသေးစိတ် စုံစမ်းနိုင်တယ်လို့လည်းဆိုပါတယ်။
