Border News Agency
မတူပီ၊စက်တင်ဘာ ၂။
ချင်းအမျိုးသားကာကွယ်ရေးတပ်ဖွဲ့ (CNO/CNDF) မှာတာဝန်ထမ်းဆောင်နေရင်း ခွင့်ခံစားနေသူတွေ၊ ခွင့်လွန်နေသူတွေနဲ့ ခွင့်မဲ့ပျက်ကွက်နေတဲ့တပ်ဖွဲ့ဝင်တွေအနေနဲ့ စက်တင်ဘာလ ၂၀ ရက်နေ့ နောက်ဆုံးထားပြီး စစ်ဌာနချုပ်ရုံးဆီပြန်လည်သတင်းပို့ကြဖို့ သတိပေးလိုက်ပါတယ်။
တပ်ဖွဲ့ဝင်အချို့ရဲ့ ကိုယ်ရေးကိုယ်တာနဲ့လူမှုရေးအခက်အခဲတွေကြောင့် ခွင့်ပြုပေးခဲ့ပေမယ့်သတ်မှတ်ချိန်အတွင်း ပြန်လည်သတင်းပို့တာမရှိဘဲ ခွင့်မဲ့ပျက်ကွက်နေကြတာကို စိစစ်တွေ့ရှိရတယ်လို့ CNDF က ဆိုပါတယ်။
အဲဒါကြောင့် ခွင့်ခံစားနေသူတွေ၊ ခွင့်လွန်နဲ့ ခွင့်မဲ့ဖြစ်နေသူတပ်ဖွဲ့ဝင်အားလုံးဟာ ရောက်နေတဲ့နယ်မြေဒေသကနေ စက်တင်ဘာလ ၂၀ ရက်နေ့အရောက်စစ်ဌာနချုပ်ရုံးဆီ ပြန်လည်သတင်းပို့ရမှာဖြစ်ပြီး သတ်မှတ်ရက်ထက်ကျော်လွန်ရင် တပ်ပြေးအဖြစ်ကြေညာသွားမယ်လို့ဆိုပါတယ်။
အဲဒီအပြင်ပြည်သူ့စစ် (CR) ပြောင်းလဲလိုသူတွေနဲ့ အငြိမ်းစားယူလိုသူတွေအနေနဲ့လည်း သတ်မှတ်ရက်အတွင်း စစ်ဌာနချုပ်ရုံးဆီလာရောက်သတင်းပို့ပြီး စည်းမျဉ်းအတိုင်းဆက်လက်ဆောင်ရွက်ရမှာဖြစ်ပါတယ်။
အဲဒီအမိန့်ကြော်ငြာချက်ကို အမှန်တကယ်သိရှိလိုက်နာဆောင်ရွက်ရမှာဖြစ်ပြီး လိုက်နာမှုမရှိဘဲပျက်ကွက်သူတွေကို ပြည်တွင်း/ပြည်ပ ဘယ်နေရာမှာပဲရှိရှိ ထိရောက်စွာအရေးယူဆောင်ရွက်သွားမယ်လို့ CNDF စစ်ဦးစီးချုပ်ဗိုလ်မှူးကြီး Jason Lian က သတိပေးထားပါတယ်။
