Border News Agency
ကျောက်ဖြူ၊ အောက်တိုဘာ ၂၀။
ကျောက်ဖြူတိုက်ပွဲတွေမှာ အာရက္ခတပ်တော်(AA)ဆီ အလင်းဝင်လာတဲ့အာ ဏာသိမ်းစစ်တပ်ရဲ့ အမှတ် ၁၁ ခြေမြန်တပ်မဌာနချုပ်လက်အောက်ခံ၊အမှတ် ၁၁၈ ခြေမြန်တပ်ရင်းမှ ကိုယ်ပိုင်နံပါတ် (ပစ-၂၁၉၇၆၀)တပ်သား စိုးမင်းသိန်းကဆိုပါတယ်။
အဲဒီရုပ်သံကို အောက်တိုဘာ ၂၀ ရက်၊ဒီနေ့ အာရက္ခတပ်တော်ထုတ်ပြန်တာပါ။
ရန်ကုန်တိုင်း၊ဒဂုံဆိပ်ကမ်းမြို့နယ် ၆၇ ရပ်ကွက်မှာ နေထိုင်သူ တပ်သားစိုးမင်းသိန်းဟာ ပြီးခဲ့တဲ့ မေလ ၈ ရက်နေ့ကအလုပ်ကအပြန်လမ်းမှာစစ်ဆေးခံရပြီးမူးယစ်ဆေးဝါးမှုနဲ့မတရားစွပ်စွဲဖမ်းဆီးခံခဲ့ရတာလို့ဆိုပါတယ်။
အဲဒီနောက် ထောင်ကျခံမလား၊ စစ်မှုထမ်းမလား ခြိမ်းခြောက် ရိုက်နှက်ခိုင်းစေခံရပြီး မှော်ဘီ တန်းမြင့်လေ့ကျင့်ရေးကျောင်းမှာ သင်တန်းတက်ရောက်ကာ ကျောက်ဖြူစစ်မျက်နှာ စနဲကုန်းတောင်စခန်းသို့ စေလွှတ်ခံခဲ့ရတာဖြစ်ပါတယ်။
”ကျွန်တော်တို့ကျွန်းတုံးတွေ ထမ်းရတယ်။ မြောင်းတွေတူးရတယ်။မလုပ်နိုင်ရင် ကျွန်တော်တို့ကို ရိုက်တယ်။ဆဲဆို ကြိမ်းမောင်းတယ်။တော်တော်လေးလည်း ဒုက္ခရောက်ပါတယ်။ကင်းဆိုရင်လည်း ကျွန်တော်တို့ ပစတွေချည်းပဲ ထွက်ရတာပါ။ ရှေ့တန်းမှာ ဒဏ်ရာရလာသူတွေကို ထမ်းစင်တွေနဲ့ ထမ်းသွားတာလည်း နေ့တိုင်းလိုလိုပါပဲ။” လို့ ရှေ့တန်းစစ်မျက်နှာသို့ ရောက်ရှိချိန်မှာကြုံတွေ့ခဲ့ရတဲ့ဒုက္ခတွေနဲ့ပတ်သက်ဘို့ တပ်သား စိုးမင်းသိန်းကထွက်ဆိုထားပါတယ်။
အာဏာသိမ်းစစ်တပ်ရဲ့ ရှေ့တန်းစစ်မျက်နှာတွေမှာ လူ့အခွင့်အရေး ချိုးဖောက်ခံရမှု၊ တပ်တွင်း ဖိနှိပ်နှိပ်စက်မှုတွေအပြင် မခံမရပ်နိုင်ဖြစ်ပြီး ကိုယ့်ကိုယ်ကို သတ်သေသူတွေပါ ရှိလာတာကြောင့် ပြည်သူ့စစ်တပ်ဖွဲ့ဝင်တွေအကြား စိတ်ဓာတ်ကျဆင်းတာတွေဖြစ်နေတယ်လို့ ဆိုပါတယ်။
အဲဒါကြောင့် စိုးမင်းသိန်း အပါအဝင် တပ်ဖွဲ့ဝင်တွေဟာ စနဲကုန်းစခန်းမှ ထွက်ပြေးစဉ် စစ်တပ်က သေနတ်နဲ့ လှမ်းပစ်ခဲ့ပေမယ့် လွတ်မြောက်ခဲ့ပြီး အာရက္ခတပ်တော်ဆီအလင်းဝင်ရောက်ဖို့ အကူအညီ တောင်းခံခဲ့ကြတာလို့ ဆိုပါတယ်။
“ကျွန်တော်တို့ ဒီမှာ အလင်းဝင်လိုက်ပါပြီ။ ဒီမှာ AA က ညီလို အကိုလိုပဲ ထားပါတယ်။ အေးအေးဆေးဆေး စိတ်ချမ်းသာစွာနဲ့ နေရပါတယ်။မိသားစုနဲ့ ပြန်တွေ့ချင်တယ်။ကိုယ့်အသက် မသေချင်ဘူးဆိုရင် AA ကို အလင်းဝင်ကြပါလို့ နှိုးဆော်ချင်ပါတယ်။” လို့ သူက ဆိုပါတယ်။
အာရက္ခဒေသမှာထိုးစစ်တွေ ပြင်းထန်လာတာနဲ့အမျှ အာဏာသိမ်းစစ်တပ်က စစ်သားတွေအကြောင်းအမျိုးမျိုးကြောင့် အလင်းဝင်ရောက်မှုတွေ ဆက်တိုက်ရှိနေပြီး တပ်တွင်း ပုန်ကန်လိုစိတ်နဲ့ ထွက်ပြေးလွတ်မြောက်လိုသူတွေပိုများနေတယ်လို့ ဆိုပါတယ်။
မိသားစုနဲ့အသက်ဘေးလုံခြုံရေးအတွက်အာရက္ခတပ်တော်ဆီ အလင်းဝင်ရောက်လာသူတွေကို အာရက္ခတပ်တော်က စောင့်ရှောက်ပေးထားပြီး လုံခြုံစိတ်ချရတဲ့နေရာသို့ ပို့ပေးထားတယ်လို့ဆိုပါတယ်။
