Border News Agency
မန္တလေး၊ နိုဝင်ဘာ ၁၉။
မန္တလေးတိုင်း၊ ပြည်ကြီးတံခွန်မြို့နယ်၊ (ည)ရပ်ကွက်ရှိ ဂိုဒေါင်တခုမှ ဒေသကာလတန်ဖိုး ငွေကျပ်ငါးဘီလီယံခန့် တန်ဖိုးရှိစိတ်ကြွရူးသွပ်ဆေးပြား သုံးဆယ့်သုံးဒသမငါးသိန်းကို ဖမ်းဆီးရမိခဲ့တယ်လို့ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ (CCDAC) က နိုဝင်ဘာလ ၁၈ ရက်မှာ ထုတ်ပြန်ပါတယ်။
ပြီးခဲ့တဲ့ ဇန်နဝါရီလ ၁ ရက်နေ့က သာစည်မြို့နယ်၊ကျွဲတပ်ဆုံကျေးရွာအနီးမှာ ဖမ်းဆီးရမိခဲ့တဲ့ စိတ်ကြွဆေးပြား ငါးဆယ့်ခြောက်သိန်းအမှုရဲ့ ကွင်းဆက်တရားခံဖြစ်သူ အောင်ဇော်မင်းခန့်ကို ထိုင်းနိုင်ငံ၊ဘန်ကောက်မြို့မှာဖမ်းဆီးရမိပြီး မြန်မာနိုင်ငံသို့ ပြန်လည်လွှဲပြောင်းပေးခဲ့ပြီးနောက် ခုလိုထပ်မံဖော်
ထုတ်ဖမ်းဆီးနိုင်ခဲ့တာ ဖြစ်ပါတယ်။
အောင်ဇော်မင်းခန့်ရဲ့ ထွက်ဆိုချက်အရ ပြီးခဲ့တဲ့ နိုဝင်ဘာလ ၄ ရက်က ပြည်ကြီးတံခွန်မြို့နယ်ရှိ ငှားရမ်းထားတဲ့ ဂိုဒေါင်ကို ဝင်ရောက်ရှာဖွေရာမှ မူးယစ်ဆေးဝါးတွေနဲ့အတူ ဂိုဒေါင်လက်ခံသိုလှောင်ပေးသူ မနှင်းနုနုလှိုင်နဲ့ ငွေကြေးလွှဲပြောင်းလက်ခံပေးသူ မထက်ထက်အောင်တို့နှစ်ဦးကို ဖမ်းဆီးရမိခဲ့တာ ဖြစ်ပါတယ်။
အဲဒီရှမ်းပြည်နယ်တောင်ပိုင်း၊ ကာလိမြို့နေ တရားခံပြေး စိုင်းခမ်းပန် ပို့ဆောင်ပေးတဲ့ မူးယစ်ဆေးဝါးတွေကို မန္တလေးမှာ ဂိုဒေါင်ငှားရမ်းသိုလှောင်ထားပြီး တမူးမြို့နေ မဟောက်မန်းကျိန် အပါအဝင် လာရောက်လက်ခံယူသူတွေထံ ပြန်လည်လွှဲပြောင်းပေးနေတာဖြစ်ပါတယ်။
အဲဒီဖမ်းဆီးရမိသူတွေကို မူးယစ်ဆေးဝါးနဲ့ စိတ်ကိုပြောင်းလဲစေသော ဆေးဝါးဆိုင်ရာဥပဒေအပြင် ပိုင်ဆိုင်မှုတွေကို သိမ်းဆည်းနိုင်ဖို့ ငွေကြေးခဝါချမှုတိုက်ဖျက်ရေးဥပဒေနဲ့ပါ အရေးယူဆောင်ရွက်နေပြီး ကွင်းဆက်တရားခံပြေးတွေကို ဆက်လက်ရှာဖွေနေတယ်လို့ဆိုပါတယ်။






