Border News Agency
ကျောက်တော်၊မေ ၂၁။
အာရက္ခတပ်တော်(AA) ထိန်းချုပ်နယ်မြေတွေရှိ ခုခံအားကျဆင်းမှုကူးစက် ရောဂါလူနာတွေအတွက် ဆေးဝါးတွေအရေးတကြီး လိုအပ်နေကြတယ်လို့ လူနာတွေက ဆိုကြပါတယ်။
အဲဒီလူနာတွေဟာ ဆေးဝါးပြတ်လပ်မူတွေ ကြုံတွေ့ခံစားနေကြရတာမို့ ဆေးဝါးအကူအညီတွေ အရေးတကြီးလိုအပ်နေကြတယ်လို့ ဆိုကြပါတယ်။
“ကျွန်တော်က ဒီရောဂါဖြစ်နေတာကိုမသိဘူး။ သွေးလှူဖို့အတွက် ဆေးစစ်ကြည့်မှသိရတာ။ဆေးရုံကတော့ ဒီရောဂါအတွက်ဆေးတွေမရှိလို့ ဘာဆေးတွေဝယ်သောက်ရမယ်ဆိုပြီး ဆေးစာရင်းတွေပေးတယ်။ ဆေးရုံမှာတောင် ဒီရော ဂါအတွက် ဆေးမရှိတာ။ကျွန်တော်က ဒီဆေးကိုဘယ်ကနေသွားဝယ်ရမလဲ။ အိတ်ချ်အိုင်ဗွီရောဂါအတွက် ရခိုင်မှာ ဆေးဝါးတွေအရေးတကြီးလိုအပ်နေတယ်” လို့ ကျောက်တော်မြို့နယ်မှလူနာတဦးက Border News Agency ကို ပြောပါတယ်။
အဲဒီအိတ်ချ်အိုင်ဗွီ(HIV) လူနာတွေအတွက် ART (Antiretroviral Therapy) ဆေးတွေ အရေးတကြီးလိုအပ်နေကြတာဖြစ်ပြီး အရင်က မြို့နယ်အလိုက် ကျန်းမာရေးဌာနတွေကတစ်ဆင့် အခမဲ့ထုတ်ပေးခဲ့တာဖြစ်ပါတယ်။
ဒါပေမယ့် အာရက္ခအဆုံးအဖြတ်စစ်ပွဲစတင်ပြီးနောက် ဆေးရုံ၊ ဆေးခန်းတွေအပါအဝင် နိုင်ငံတကာလူသားချင်းစာနာထောက်ထားမှုဆိုင်ရာအကူအညီပေးရေးတွေလည်း ပိတ်သိမ်းရပ်တန့်သွားကြတာမို့ ဆေးဝါးပြတ်လပ်သွားတာလို့ဆိုကြပါတယ်။
အဲဒီအပြင် အာဏာသိမ်းစစ်တပ်က လမ်းခရီးအားလုံးအပါအဝင် ကုန်စည်စီးဆင်းမှုတွေ၊ဆေးဝါးသယ်ယူတာတွေကို တားဆီးကန့်သတ်ထားတာမို့ ဆေးဝါးပြတ်လပ်သွားတာလို့ အာရက္ခပြည်သူတွေက ဆိုကြပါတယ်။
အဲဒါကြောင့် အာရက္ခတပ်တော်ထိန်းချုပ်နယ်မြေတွေက အိတ်ချ်အိုင်ဗွီလူနာတွေဟာ ART ဆေးပြတ်လပ်ပြီး ကျန်းမာရေးတွေ ဆိုးဝါးနေကြတယ်လို့ အာရက္ခပြည်သူတွေက ဆိုကြပါတယ်။
“HIV လူနာတွေက ဆေးလုံးဝပြတ်လို့မရဘူး။ လူနာတွေက ဆေးဝါးတွေအလွယ်တကူရတဲ့ ပြည်မဘက်ပြောင်းပြီးနေသင့်ပေမဲ့ ရခိုင်ကလူနာတွေက လမ်းပိတ်ထားလို့ အခက်အခဲပေါင်းစုံနဲ့ကြုံနေရတယ်။ ဆေးပြတ်လပ်နေလို့ ကျန်းမာရေးဆိုးဝါးလာတဲ့ သူတို့ကိုမြင်ရင် စိတ်မကောင်းဖြစ်ရတယ်။ ကိုယ်တိုင်လည်း အခုကဘာမှမကူညီနိုင်ဘူး။ အခုက မြို့နယ်အများစုကို အေအေက ထိန်းချုပ်ထားပြီဆိုတော့ ဒီဆေးကိစ္စကိုလည်း တဖက်တလမ်းက ဖြေရှင်းပေးသင့်တယ်လို့ မြင်တယ်။” လို့ ကျောက်တော်မြို့နယ်မှကျန်းမာရေးဝန်ထမ်းဟောင်းတဦးက Border News Agency ကို ပြောပါတယ်။
အဲဒီ ART (Antiretroviral Therapy) ဆေးဟာ အိတ်ချ်အိုင်ဗွီလူနာတွေအတွက် သွေးနဲ့ကိုယ်တွင်းအရည်ထဲမှာရှိတဲ့ အိတ်ချ်အိုင်ဗွီပိုးတွေကို မပြန့်ပွားအောင်ထိန်းပေးတာဖြစ်ပါတယ်။
အဲဒီအေအာတီဆေးကို ပုံမှန်သောက်ပေးမယ်ဆိုရင် ကိုယ်ခံအားကောင်းပြီး သာမန်လူသားတယောက်လိုသက်တမ်းရှည်ကြာစွာ နေထိုင်နိုင်မှာ ဖြစ်ပါတယ်။
ဒါပေမယ့် အေအာတီဆေးကို အိတ်ချ်အိုင်ဗွီလူနာတွေ ပုံမှန်မသောက်သုံးရပါက လူနာတွေဟာ ခုခံအားကျဆင်းမှု ကူးစက်ရောဂါ(အေအိုင်ဒီအက်စ်)ဖြစ် ပွားလာပြီး သေဆုံးသွားနိုင်တယ်လို့ ဆိုကြပါတယ်။
အာရက္ခအဆုံးအဖြတ်စစ်ပွဲမစတင်ခင်တုန်းက အေအာတီဆေးထုတ်ယူနေတဲ့ အိတ်ချ်အိုင်ဗွီရောဂါပိုးရှိလူနာ ငါးရာကျော်ထိရှိခဲ့တာမို့ လူနာအများစုဟာ ဆေးဝါးပြတ်လပ်မူတွေနဲ့ ကြုံနေကြရ တယ်လို့ ကျန်းမာရေးဝန်ထမ်းတွေက ဆိုကြပါတယ်။
အဲဒီအေအာတီဆေးဝါးပြတ်လပ်လို့ ပြီးခဲ့တဲ့နှစ်မှာ အမျိုးသားတဦး၊ အမျိုးသမီးနှစ်ဦးသေဆုံးသွားခဲ့တယ်လို့လ ည်း ကျန်းမာရေးဝန်ထမ်းတွေက ဆိုကြပါတယ်။
အာရက္ခအဆုံးအဖြတ်စစ်ပွဲမှာ အာရက္ခတပ်တော်ဟာ ပလက်ဝဒေသအပါအဝင် တဆယ့်ငါးမြို့နယ်ကို သိမ်းပိုက်ထိန်းချုပ်ထားပြီး အာရက္ခပြည်သူ့တော် လှန်ရေးအစိုးရအဖြစ် အုပ်ချုပ်ရေးယန္တရားတွေ ဖော်ဆောင်နေပါတယ်။
အဲဒီအာရက္ခပြည်သူ့တော်လှန်ရေးအာစိုးရလက်အောက်မှာ အာရက္ခပြည်သူ့ကျန်းမာရေးဌာနကို ဖွဲ့စည်းပြီး အာရက္ခပြည်သူတွေကို ကျန်းမာရေးဝန်ဆောင်မှုတွေ ဆောင်ရွက်ပေးနေပါတယ်။
