Border News Agency
ဘူးသီးတောင်၊ မတ် ၇။
အာရက္ခတပ်တော် (AA) ထိန်းချုပ်ထားတဲ့ ဘူးသီးတောင်မြို့နယ်မှာ မတူကွဲပြားတဲ့ လူမျိုးစုတွေရဲ့ရိုးရာယဉ်ကျေးမှုနဲ့ အစားအစာ နှီးနှောဖလှယ်ပွဲကို ကံ့ကော်လူမှုဖွံ့ဖြိုးရေးအဖွဲ့က ဦးဆောင်ပြီး မတ်လ ၇ ရက်၊ဒီနေ့မနက်ပိုင်းမှာ ကျင်းပခဲ့ပါတယ်။
အဲဒီပွဲကို ဘူးသီးတောင်မြို့နယ်မှာ နေထိုင်ကြတဲ့ ရခိုင်၊မြို၊ ခမီ၊ သက်၊ ဒိုင်းနက် (သက္ကမ) နဲ့ မူဆလင်လူမျိုး ရာနဲ့ချီ တက်ရောက်ခဲ့ကြပါတယ်။
အာရက္ခဒေသတွင်း နေထိုင်ကြတဲ့ လူမျိုးစုတွေအကြား တဦးနဲ့တဦး ရိုးရာဓလေ့နဲ့ တန်ဖိုးထားမှုတွေကို အပြန်အလှန် နားလည်စေဖို့နဲ့ လူမှုသဟဇာတဖြစ်စေဖို့ ရည်ရွယ်ကျင်းပတာ ဖြစ်ပါတယ်။
အဲဒီ အခမ်းအနားမှာ လူမျိုးစုအလိုက် ရိုးရာအကတွေနဲ့ ဖျော်ဖြေခဲ့ကြသလို မိမိတို့ရဲ့ ရိုးရာအစားအစာတွေကိုလည်း အပြန်အလှန် ဖလှယ်စားသောက်ကာ ရင်းနှီးပွင့်လင်းစွာ ဆွေးနွေးခဲ့ကြတယ်လို့ သိရပါတယ်။
အာရက္ခဒေသမှာ အခုလို လူမျိုးပေါင်းစုံပါဝင်တဲ့ ယဉ်ကျေးမှုဖလှယ်ပွဲတွေကျင်းပနိုင်တာဟာ ဒေသတွင်း ငြိမ်းချမ်းစွာ အတူယှဉ်တွဲနေထိုင်ရေးအတွက် အလားအလာကောင်းတခု ဖြစ်ပါတယ်။
