Border News Agency
မဲဆောက်၊ ဖေဖော်ဝါရီ ၂၆။
ထိုင်းနိုင်ငံ၊ တာ့ခ်ခရိုင်၊ မဲဆောက်မြို့ရှိ နေရာနှစ်ခုကို ဖေဖော်ဝါရီလ ၂၅ ရက်နေ့ က လဝကနဲ့အလုပ်သမားညွှန်ကြားမှုဦးစီးဌာနတို့ပူးပေါင်းပြီး ရှောင်တခင်စစ်ဆေးဖမ်းဆီးမှုတွေ လုပ်ဆောင်ခဲ့ပါတယ်။
အဲဒီ မဲဆောက်မြို့၊ ချစ်ဝနာလမ်းရှိ “နိုရာ” အမည်ရှိအစားအသောက်ဆိုင်မှာ အလုပ်လုပ်နေတဲ့ အသက် ၄၅ နှစ်နဲ့ ၃၃ နှစ်အရွယ် မြန်မာနိုင်ငံသား ၂ ဦးကို ပါမစ်မရှိဘဲ အလုပ်လုပ်နေတာကြောင့် ဖမ်းဆီးခဲ့တာပါ။
အဲဒီနောက် ချစ်ဝနာလမ်းထဲမှာပဲရှိတဲ့ အမည်မဖော်ထားတဲ့ အလုပ်သမားအေဂျင်စီရုံးတခုကို ထပ်မံစစ်ဆေးခဲ့ရာမှာလည်း အလုပ်သမားပါမစ်မရှိဘဲ အလုပ်လုပ်ကိုင်နေတဲ့ မြန်မာနိုင်ငံသား ၃ ဦးကို ထပ်မံဖမ်းဆီးရမိခဲ့ပါတယ်။
အဲဒီဖမ်းဆီးခံရသူ ၅ ဦးလုံးဟာ အလုပ်သမားလက်မှတ် ဒါမှမဟုတ် အလုပ်လုပ်ကိုင်ခွင့်ပါမစ်မရှိဘဲ လုပ်ကိုင်နေကြတာဖြစ်လို့ နိုင်ငံခြားသားများ အလုပ်လုပ်ကိုင်ခွင့်ဆိုင်ရာဥပဒေနဲ့ အရေးယူခံရမှာ ဖြစ်ပါတယ်။
လတ်တလောမှာတော့ ဖမ်းဆီးရမိသူတွေကို ဥပဒေအရအရေးယူနိုင်ဖို့အတွက် မဲဆောက်မြို့မရဲစခန်းကို ပို့ဆောင်ထားပြီး နယ်စပ်ဒေသတွေမှာ အခုလိုစစ်ဆေးမှုတွေကို ဆက်တိုက်လုပ်ဆောင်နေတယ်လို့ သိရပါတယ်။
