Border News Agency
ဖားကန့်၊ဇူလိုင် ၅။
ကချင်ပြည်၊ဖားကန့်မြို့နယ်ရှိကျောက်စိမ်းလုပ်ကွက်တခုမှာ မြေစာပုံပြိုကျလို့ ပျောက်ဆုံးနေတဲ့အရပ်သား ၇ ဦးစလုံးရဲ့ ရုပ်အလောင်းတွေကို ပြန်လည်ရှာဖွေတွေ့ရှိခဲ့တယ်လို့ ဒေသခံတွေဆီက သိရပါတယ်။
အဲဒီမြေပြိုမှုဟာ ဇူလိုင်လ ၃ ရက်၊မနက် ၉ နာရီခွဲအချိန်က ဆိပ်မူကျေးရွာအုပ်စု၊နမ့်မှော်ရွာနဲ့ ကောင်စံရွာကြားမှာရှိတဲ့ စိန်လုံတောင်တန်းကြောကျောက်စိမ်းလုပ်ကွက်မှာ ဖြစ်ပွားခဲ့တာပါ။
အဲဒီကျောက်စိမ်းလုပ်ကွက်အတွင်း ဝန်ထမ်းတွေ အလုပ်လုပ်နေတုန်း မိုးအဆက်မပြတ်ရွာသွန်းမှုကြောင့် မြေသားတွေပွပြီး ရုတ်တရက် မြေစာပုံပြိုကျကာ ခုလိုပိမိသွားခဲ့တာဖြစ်ပါတယ်။
အဲဒီအလောင်းတွေကို ဇူလိုင်လ ၃ ရက်နေ့က ရှာဖွေကယ်ဆယ်ရေးတွေ အပြင်းအထန်လုပ်ဆောင်ခဲ့ပြီးနောက် ပျောက်ဆုံးနေသူ ၇ ဦးစလုံးရဲ့ ရုပ်အလောင်းတွေကို အားလုံး ပြန်လည်ဆယ်ယူနိုင်ခဲ့တာ ဖြစ်ပါတယ်။
ပြီးခဲ့တဲ့ ဇွန်လ ၂၇ ရက်နေ့ကလည်း ဖားကန့်နမ့်မှော်ရွာမှာပဲ မြေစာပုံပြိုကျခဲ့လို့ ရေမဆေးကျောက်ရှာဖွေသူ ၁၀ ဦး ပျောက်ဆုံးခဲ့ပြီး ၇ ဦးရဲ့ ရုပ်အလောင်းကို ပြန်တွေ့ခဲ့ပါသေးတယ်။
