Border News Agency
ဘင်္ဂလားဒေ့ရှ်၊ ဩဂုတ် ၂၅။
အာဏာသိမ်းစစ်တပ်က ရခိုင်ရှိ ရိုဟင်ဂျာတွေအပေါ် အကြမ်းဖက်စစ်ဆင်ရေးတွေစတင်ခဲ့တာဟာ ကိုးနှစ်ပြည့်ပြီဖြစ်ပေမယ့် တရားမျှတမှုရဖို့စောင့်ဆိုင်းနေရဆဲလို့ မြန်မာနိုင်ငံဆိုင်ရာ လွတ်လပ်သောစုံစမ်းစစ်ဆေးမှုယန္တရား (IIMM)က ဩဂုတ်လ ၂၄ ရက်နေ့ထုတ်ပြန်ပါတယ်။
၂၀၁၇ ခုနှစ်စစ်ဆင်ရေးတွေအတွင်း သတ်ဖြတ်ခံရမှု၊လိင်ပိုင်းဆိုင်ရာအကြမ်းဖက်ခံရမှုနဲ့နေအိမ်တွေဖျက်ဆီးခံရမှုကြောင့် သိန်းနဲ့ချီတဲ့ရိုဟင်ဂျာတွေ ဘင်္ဂလားဒေ့ရှ်နဲ့အိမ်နီးချင်းနိုင်ငံတွေသို့ ထွက်ပြေးခဲ့ရပေမယ့် ကိုးနှစ်ကြာထိဘေးကင်းစွာပြန်နေထိုင်နိုင်တာ မရှိသေးသလိုအဲဒီရာဇဝတ်မှုတွေအတွက် ဘယ်သူမှအရေးယူခံရတာမရှိသေးဘူးလို့ဆိုပါတယ်။
ရခိုင်မှာစစ်ပွဲတွေဆက်ဖြစ်နေပြီး မြန်မာနိုင်ငံမှာကျန်နေတဲ့ရိုဟင်ဂျာတွေဟာ လိင်ပိုင်းဆိုင်ရာ အကြမ်းဖက်မှုနဲ့ ဥပဒေမဲ့သတ်ဖြတ်ခံရမှုတွေအပါအဝင် အသက်အန္တရာယ်ခြိမ်းခြောက်မှုတွေနဲ့ ရင်ဆိုင်နေရတာကြောင့် ပင်လယ်ခရီးနဲ့ စွန့်စားထွက်ပြေးနေကြရတယ်လို့ဆိုပါတယ်။
IIMMဟာ တာဝန်ရှိသူတွေကို ဖော်ထုတ်နိုင်ဖို့ မျက်မြင်သက်သေတွေနဲ့ အသက်ရှင်ကျန်ရစ်သူရာနဲ့ချီကိုတွေ့ဆုံမေးမြန်းကာ အထောက်အထားတွေစုဆောင်းထားတယ်လို့ဆိုပါတယ်။
အဲဒီစုံစမ်းစစ်ဆေးမှုတွေမှာ မြန်မာလုံခြုံရေးတပ်ဖွဲ့တွေသာမက အာရက္ခတပ်တော် (AA)၊ အာရကန်ရိုဟင်ဂျာကယ်တင်ရေးတပ်မတော် (ARSA) နဲ့ တခြားလက်နက်ကိုင်အဖွဲ့တွေအပြင် ရာဇဝတ်မှုတွေမှာ ပါဝင်ပတ်သက်တဲ့နိုင်ငံရေးသမားတွေ၊စီးပွားရေးလုပ်ငန်းရှင်တွေနဲ့ အဖွဲ့အစည်းတွေလည်းပါဝင်တယ်လို့ ဆိုပါတယ်။
အဲဒီအပြင် နိုင်ငံတကာတရားရုံး (ICJ)၊ နိုင်ငံတကာရာဇဝတ်ခုံရုံး (ICC)နဲ့ အာဂျင်တီးနားနိုင်ငံမှာ တရားစွဲဆိုထားတဲ့အမှုတွေအတွက်လည်း စိစစ်သုံးသပ်ထားတဲ့အထောက်အထားတွေနဲ့ အချက်အလက်တွေကိုမျှဝေပေးထားတယ်လို့ဆိုပါတယ်။
