Border News Agency
မီဇိုရမ်၊ အောက်တိုဘာ ၉။
အိန္ဒိယ–မြန်မာနယ်စပ် မီဇိုရမ်ပြည်နယ်၊ ချန်ဖိုင်းခရိုင်မှာ မူးယစ်ဆေးဝါးဆယ်ကီလိုဂရမ်ကို ဒေသခံလူငယ်အဖွဲ့ကကြားဖြတ်ဖမ်းဆီးရမိခဲ့ပြီး သယ်ဆောင်သူနှစ်ဦးဟာ မြန်မာနိုင်ငံဘက်ခြမ်းကို ထွက်ပြေးလွတ်မြောက်သွားတယ်လို့ ဒေသတွင်းမီဒီယာတွေမှာဖော်ပြပါတယ်။
ချန်ဖိုင်းခရိုင်၊ တလန်ဆမ်ကျေးရွာအုပ်စုအနီး လယ်ကွင်းတခုမှာ အောက်တိုဘာလ ၈ ရက်နေ့က သံသယဖြစ်ဖွယ်လူနှစ်ဦးကို TlanYMA အဖွဲ့ဝင်တွေက တားဆီးစစ်ဆေးဖို့ပြုလုပ်ခဲ့တာပါ။
အဲဒီသံသယရှိသူနှစ်ဦးဟာ သယ်ဆောင်လာတဲ့ပစ္စည်းတွေကိုစွန့်ပစ်ပြီး နယ်စပ်ကိုဖြတ်ကျော်ကာ မြန်မာနိုင်ငံဘက်ကို ထွက်ပြးလွတ်မြောက်သွားခဲ့တာဖြစ်ပါတယ်။
ကျန်ခဲ့တဲ့အထုပ်တွေကိုစစ်ဆေးရာ မက်သ် စိတ်ကြွဆေးဝါးတွေဖြစ်နေတာကြောင့် YMA တာဝန်ရှိသူတွေက မီဇိုရမ်ပြည်နယ် အကောက်ခွန်နဲ့ မူးယစ်ဆေးဝါးထိန်းချုပ်ရေးဦးစီးဌာနနဲ့ အာသန်ရိုင်ဖယ် တပ်ဖွဲ့ဆီလွှဲပြောင်းပေးခဲ့တာပါ။
သိမ်းဆည်းရမိတဲ့ မူးယစ်ဆေးဝါးတွေဟာ စုစုပေါင်းဆယ်ကီလိုဂရမ် ရှိပြီး မူးယစ်ဆေးဝါးနဲ့ စိတ်ကိုပြောင်းလဲစေတဲ့ ဆေးဝါးဆိုင်ရာဥပဒေနဲ့အမှုဖွင့်ထားပါတယ်။
အဲဒီထွက်ပြေးလွတ်မြောက်သွားတဲ့ တရားခံနှစ်ဦးကို ဖမ်းဆီးရမိရေးနဲ့ မူးယစ်ဆေးဝါးကွင်းဆက်တွေကို အာဏာပိုင်တွေက ဆက်လက်စုံစမ်းစစ်ဆေးနေပါတယ်။
