Border News Agency
ကျောက်တော်၊ အောက်တိုဘာ ၉။
အိန္ဒိယနိုင်ငံ၊ မီဇိုရမ်ပြည်နယ်၊ လောင်းတလိုင်ခရိုင်မှာ နိုင်ငံခြားသားတွေနဲ့ စစ်ဘေးရှောင်တွေရဲ့ နေထိုင်သွားလာမှုအပေါ် စစ်ဆေးကြပ်မတ်မှုတွေပိုတင်းကျပ်လာတယ်လို့ စစ်ရှောင်တွေကဆိုကြပါတယ်။
အဲဒီလောင်တလိုင်မှာ အောက်တိုဘာလ ၇ ရက်နေ့ကလုပ်တဲ့ ခရိုင်အဆင့်လုံခြုံရေး အစည်းအဝေးမှာ စက်တင်ဘာလကစပြီး အရပ်ဘက်အဖွဲ့အစည်းတွေက နိုင်ငံခြားသားနဲ့ စစ်ဘေးရှောင်တွေ နေအိမ်ငှားရမ်းနေထိုင်မှုကို လိုက်လံစစ်ဆေးနေကြောင်း တင်ပြခဲ့ကြတာပါ။
“စစ်ဆေးတာတွေ ခပ်စိတ်စိတ်ဖြစ်လာတော့ အရင်လိုသွားလာရတာ မလွတ်လပ်တော့ဘူး။အထူးသဖြင့်ညဘက်ဆိုရင် ဘာအရေးကြီးကိစ္စမှအပြင်မထွက်ရဲကြတော့ဘူး။” လို့ လောင်တလိုင်မှာရောက်ရှိနေတဲ့ မြန်မာစစ်ဘေးရှောင်အမျိုးသားတဦးက Border News Agency ကိုပြောပါတယ်။
မြန်မာက နယ်စပ်ဖြတ်သန်းခွင့်လက်မှတ်မရှိဘဲ ဝင်ရောက်လာတာ၊ သက်တမ်းကျော်လွန်နေထိုင်တာတွေအပြင် တည်းခိုခန်းတချို့မှာလည်း အချက်အလက်မပြည့်စုံဘဲလက်ခံထားတာတွေရှိနေတယ်လို့ ခရိုင်အရာရှိတဦးကပြောပါတယ်။
“အခုလို စည်းကမ်းတွေပိုတင်းကျပ်လိုက်တော့ အသစ်ထပ်ရောက်လာမယ့် စစ်ဘေးရှောင်တွေအတွက် နေစရာအိမ်ငှားဖို့ အရမ်းခက်ခဲသွားတယ်။ စစ်ဘေးဒဏ်လွတ်အောင်လာရတဲ့သူတွေအတွက် ပိုပြီးဖိအားဖြစ်ရပါတယ်။” လောင်တလိုင်မှာနေထိုင်တဲ့ မြန်မာလူမျိုးတဦးက Border News Agency ကိုပြောပါတယ်။
လောင်းတလိုင်ခရိုင်မှာ နိုင်ငံခြားသားနဲ့ စစ်ဘေးရှောင်တွေနေအိမ်ငှားရမ်းခွင့်ကို ကန့်သတ်ထားပြီး ည ရှစ်နာရီနောက်ပိုင်း အရေးပေါ် အခြေအနေမှအပ အပြင်ထွက်သွားလာခွင့်ကိုလည်း တားမြစ်ထားပါတယ်။
အဲဒီလိုတင်းကျပ်စစ်ဆေးမှုတွေဟာ စစ်ဘေးရှောင်တွေရဲ့ သွားလာနေထိုင်မှုအပေါ် တိုက်ရိုက် သက်ရောက်နိုင်သလို နယ်စပ် ကုန်သွယ်ရေးနဲ့ ပလက်ဝ – မီဇိုရမ် ဆက်သွယ်ရေးလမ်းကြောင်းတွေပေါ်မှာပါ သက်ရောက်မှုတွေရှိလာနိုင်တယ်လို့ ဒေသခံတွေကဆိုကြပါတယ်။
