Border News Agency
မလေးရှား၊အောက်တိုဘာ ၁၀။
မလေးရှားနိုင်ငံ၊ ဂျိုဟိုးပြည်နယ်၊ ဂီလန်ပါတားဒေသရှိ စက်ရုံနှစ်ရုံကို လူဝင်မှုကြီးကြပ်ရေးဌာနကဝင်ရောက်စီးနင်းခဲ့ရာ မြန်မာနိုင်ငံသားတရာလေးဆယ်ဦး အပါအဝင် တရားမဝင်ရွှေ့ပြောင်းလုပ်သား တစ်ရာခုနှစ်ဆယ်ခုနှစ်ဦးဖမ်းဆီးခံခဲ့ရပါတယ်။
အောက်တိုဘာလ ၅ရက်၊ညနေပိုင်းက အီလက်ထရွန်နစ်စက်ရုံနဲ့ သတ္တုအင်ဂျင်နီယာစက်ရုံတို့ကို ဝင်ရောက်စစ်ဆေးခဲ့တာဖြစ်ပြီး စစ်ဆေးမှုကိုရှောင်လွှဲဖို့ ထွက်ပြေးဖို့ ကြိုးပမ်းခဲ့ကြပေမယ့် လုံခြုံရေးတပ်ဖွဲ့တွေက ပိတ်ဆို့ဖမ်းဆီးနိုင်ခဲ့တာ ဖြစ်ပါတယ်။
ဖမ်းဆီးခံရသူတွေထဲမှာ မြန်မာနိုင်ငံသားအမျိုးသားသုံးဆယ့်လေးဦးနဲ့ အမျိုးသမီးတရာ့ခြောက်ဦးအပါအဝင် ဘင်္ဂလားဒေ့ရှ်၊ အိန္ဒိယနဲ့ နီပေါနိုင်ငံသားတွေ ပါဝင်ပြီး ဥပဒေအရဆက်လက်အရေးယူနိုင်ဖို့ ပီကန်နဲနက်စ်ထိန်းသိမ်းရေးစခန်းကို ပို့ဆောင်ထားပါတယ်။
အလုပ်လုပ်ကိုင်ခွင့်ပါမစ်မရှိဘဲ နိုင်ငံခြားသားတွေကို တရားမဝင်ခန့်အပ်ထားတဲ့ အလုပ်ရှင်တွေကို ပြင်းပြင်းထန်ထန်အရေးယူသွားမယ်လို့ ဂျိုဟိုးပြည်နယ် လူဝင်မှုကြီးကြပ်ရေးဌာနက သတိပေးထုတ်ပြန်ထားပါတယ်။
