Border News Agency
ချင်းမိုင်၊အောက်တိုဘာ ၁၀။
ထိုင်းနိုင်ငံ၊ချင်းမိုင်မြို့၊ဆန်ဆိုင်းရပ်ကွက်ရှိ မြန်မာနိုင်ငံသားတဦးငှားရမ်းနေထိုင်တဲ့အခန်းအတွင်းမှ မူးယစ်ဆေး ၂၈၇ ကီလိုဂရမ်ကို ထိုင်းရဲတပ်ဖွဲ့ကသိမ်းဆည်းရမိခဲ့ပါတယ်။
ဆန်ဆိုင်းရပ်ကွက်၊ဆန်ဖရာနက်ဒေသ၊ မယ်ခေါင်ရွာရှိ အဆောင်ခန်းဒုတိယထပ်ကို အောက်တိုဘာလ ၉ ရက်၊ ည ၇ နာရီခွဲအချိန်ခန့်မှာ ထိုင်းရဲတပ်ဖွဲ့၊အမှတ် ၅ မူးယစ်ဆေးဝါးနဲ့ မှုခင်းစုံစမ်းရေးအဖွဲ့ကဝင်ရောက်ရှာဖွေခဲ့တာဖြစ်ပါတယ်။
အဲဒီလိုဝင်ရောက်ရှာဖွေစစ်ဆေးရာ Mr. Jai “ဂျိုင်” အမည်ရှိ မြန်မာနိုင်ငံသားတဦးအခန်းမှ ပလတ်စတစ်သေတ္တာအတွင်းဝှက်ထားတဲ့ မူးယစ်ဆေးအိုင်စ် (ICE)၂၈၇ ထုပ်ခန့်ကိုတွေ့ရှိခဲ့တာဖြစ်ပါတယ်။
အခန်းကိုငှားရမ်းထားသူ Mr. Jai “ဂျိုင်”ဟာ ရဲတပ်ဖွဲ့ဝင်ရောက်မစစ်ဆေးမီကတည်းကနေ အခန်းမှထွက်ပြေးသွားခဲ့တာဖြစ်ပါတယ်။
အဲဒီသိမ်းဆည်းရမိတဲ့မူးယစ်ဆေးတွေကို ဆန်ဆိုင်းရဲစခန်းသို့လွှဲပြောင်းပေးထားပြီး ထွက်ပြေးသွားတဲ့မြန်မာနိုင်ငံသားကိုဖမ်းဆီးနိုင်ရေးနဲ့မူးယစ်ဆေးဝါးကွန်ရက်မှာ ပါဝင်ပတ်သက်သူတွေကို ဖော်ထုတ်နိုင်ရေးဆက်လက်စုံစမ်းနေပါတယ်။
