​Border News Agency
ကျောက်တော်၊ ဩဂုတ် ၂၅။

​ဒေသဖွံ့ဖြိုးရေးနဲ့ အများပြည်သူ လူမှုစီးပွားဘဝမြှင့်မားလာစေဖို့အတွက် လိုအပ်လာရင် အစိုးရစီမံခန့်ခွဲပိုင်ခွင့်ရှိမြေအဖြစ် ပြန်လည်ရယူတာတွေကို ဥပဒေနဲ့အညီဆောင်ရွက်သွားမယ်လို့ ရက္ခိုင်အမျိုးသားအဖွဲ့ချုပ်(ULA)ရဲ့ ဗဟိုမြေယာစီမံခန့်ခွဲမှုကော်မတီကဆိုပါတယ်။

အဲဒီ​လမ်း၊တံတား၊ဈေး၊စာသင်ကျောင်း၊ဆေးရုံနဲ့ ပန်းခြံတွေအပြင် ကျေးလက်/မြို့ပြအိမ်ရာမြေ၊စက်မှုဇုန်တွေနဲ့ လုံခြုံရေးဆိုင်ရာအဆောက်အအုံတွေ တည်ဆောက်ရေးလို အများပြည်သူအကျိုးပြုရေရှည်စီမံကိန်းတွေအတွက် မြေယာတွေကိုပြန်လည်ရယူရတာလို့ဆိုပါတယ်။

အဲဒီအပြင် ​အများပြည်သူအကျိုးအတွက် လမ်းတိုးချဲ့တာမျိုးတွေဆောင်ရွက်ရာမှာလည်း သက်ဆိုင်ရာလယ်ယာမြေတွေထဲကဘယ်လောက်ကို နိုင်ငံတော်စီမံကိန်းမြေအဖြစ် သတ်မှတ်မလဲဆိုတာကို ရှင်းရှင်းလင်းလင်းခွဲခြားပြီးမှ ဆောင်ရွက်သွားမယ်လို့ဆိုပါတယ်။

အဲ​ဒီလိုစီမံကိန်းတွေအတွက် မြေယာပြန်လည်ရယူရာမှာ နစ်နာသူတွေမနစ်နာရအောင် ပြန်လည်နေရာချထားရေးနဲ့ ထိုက်သင့်တဲ့လျှော်ကြေး၊ပြောင်းရွှေ့ကြေးတွေကို ဥပဒေအတိုင်း စနစ်တကျထောက်ပံ့ပေးသွားမယ်လို့ဆိုပါတယ်။

အဲ​ဒါကြောင့် အာရက္ခဒေသပြန်လည်တည်ဆောက်ရေးနဲ့ မြေယာဆိုင်ရာလုပ်ငန်းစဉ်တွေချောမွေ့စေဖို့အတွက် ပြည်သူလူထုဟာ ယုံကြည်မှုအပြည့်နဲ့ပူးပေါင်းဆောင်ရွက်ပေးကြဖို့ ဗဟိုမြေယာကော်မတီက တိုက်တွန်းထားပါတယ်။

အာရက္ခတပ်တော်ထိန်းချုပ်ထားတဲ့ မြောက်ဦးမြို့နယ်၊ပေါင်းတုတ်ကျေးရွာအနီးရှိကားလမ်းဘေးမြေနေရာတွေကို မြို့ပြစီမံကိန်းအကြောင်းပြပြီး အာရက္ခတပ်တော်(AA)တပ်မှူးချုပ် ဗိုလ်ချုပ်ထွန်းမြတ်နိုင်အမိန့်ပေးစေခိုင်းချက်အရဆိုကာ မြောက်ဦးမြို့နယ်အုပ်ချုပ်ရေးဌာနက ၁၈၉၄ ခုနှစ် မြေသိမ်းအက်ဥပဒေအရသိမ်းယူဖို့ကြိုးစားနေပါတယ်။

ဒါပေမယ့် ၁၈၉၄ ခုနှစ် မြေသိမ်းအက်ဥပဒေအရ နစ်နာမှုလျှော်ကြေးပေးရမယ့်ကာလပေါက်စျေးကို မပေးသေးဘဲမြေပိုင်ရှင်တွေကို ခြိမ်းခြောက်အကြပ်ကိုင်နေသလို မြေပုံမြို့နယ်ရှိပုစွန်တာဧကရာချီကိုလည်း အာရက္ခတပ်တော်(AA) တပ်မှူးချုပ်၊ဗိုလ်ချုပ်ထွန်းမြတ်နိုင်ရဲ့ ဦးလေးတော်စပ်သူ၊တရားဥပဒေစိုးမိုးရေးနဲ့ ပြည်သူ့လုံခြုံရေးဌာန(ဒီလပ်)ချုပ် ဦးအောင်သာဝင်းဦးဆောင်းပြီး အတင်းအဓမ္မသိမ်းယူကာ လက်နက်ကိုင်တပ်ဖွဲ့ဝင်တွေကို စခန်းချနေထိုင်ခိုင်းထားပါတယ်။

အာရက္ခအဆုံးအဖြတ်စစ်ပွဲမှာ အာရက္ခတပ်တော်(AA)ဟာ ပလက်ဝဒေသအပါအဝင် တဆယ့်ငါးမြို့နယ်ကို တိုက်ခိုက်သိမ်းပိုက်ထိန်းချုပ်ထားပြီးနောက် အာရက္ခပြည်သူ့တော်လှန်ရေးအစိုးရအဖြစ်အုပ်ချုပ်ရေးယန္တရားတွေဖော်ဆောင်နေပါတယ်။

အဲဒီအာရက္ခတပ်တော်ထိန်းချုပ်နယ်မြေတွေမှာ ရက္ခိုင်အမျိုးသားအဖွဲ့ချုပ် (U LA)ရဲ့ ဗဟိုမြေယာစီမံခန့်ခွဲမှုကော်မတီကို ဗိုလ်မှူးချုပ်ကျော်ဟန်ကဥက္ကဋ္ဌ၊ဦးကျော်ဇံကအတွင်းရေးမှူးတာဝန်ယူထားကြပြီး ရခိုင်အမျိုးသားပါတီ(ANP) ရဲ့ ပေါက်တောမြို့နယ်အမျိုးသားလွှတ်တော်ကိုယ်စားလှယ်ဟောင်း ဦးတက်ထွန်းအောင်အပါအဝင် ဦးမောင်ဦးကျော်၊ဦးသာထွန်းရွှေနဲ့ တခြားသူတွေဟာပါမတီဝင်တွေအဖြစ်တာဝန်ယူ ဆောင်ရွက်နေကြပါတယ်။

ဒါပေမယ့် အတင်းအဓမ္မမြေသိမ်းမှု၊လူ့အခွင့်အရေးချိုးဖောက်မှုမြောက်စေမယ့်မြေသိမ်းမှုတွေကို အာရက္ခတပ်တော်(AA)တပ်မှူးချုပ်၊ဗိုလ်ချုပ်ထွန်းမြတ်နိုင်ရဲ့ ဦးလေးတော်စပ်သူ၊တရားဥပဒေစိုးမိုးရေးနဲ့ပြည်သူ့လုံခြုံရေးဌာန(ဒီလပ်)ချုပ်ဦးအောင်သာဝင်းအပါအဝင် အာရက္ခတပ်တော်(AA)အရာရှိတွေ၊အာရက္ခတပ်တော်(AA)ရဲ့ ဗဟိုထောက်လှမ်းရေးတာဝန်ရှိသူတွေ မြေသိမ်းယူထားတာတွေလည်းရှိနေတယ်လို့ အာရက္ခပြည်သူတွေက ဆိုကြပါတယ်။

အဲဒီအာရက္ခတပ်တော်ထိန်းချုပ်နယ်မြေတွေမှာ နှုတ်မိန့်နဲ့ အတင်းအဓမ္မမြေသိမ်းမှုတွေအပါအဝင် မြေယာအမှုပေါင်းများစွာကို Border News Agency ကလက်ခံရရှိထားပြီး ရက္ခိုင်အမျိုးသားအဖွဲ့ချုပ်(ULA)ရဲ့ဗဟိုမြေယာစီမံခန့်ခွဲမှုကော်မတီက တာဝန်ယူ​ဖြေရှင်းပေးနိုင်တဲ့မြေယာအမှုမရှိသလောက်နည်းပါးနေသေးတာကို Border News Agency က လေ့လာတွေ့ရှိရပါတယ်။