Border News Agency
မောင်တော၊ ဩဂုတ် ၂၅။
အာရက္ခတပ်တော်(AA)ထိန်းချုပ်ထားတဲ့ မောင်တောမြို့နယ်၊ နတ်မြစ်ထဲမှာငါးရှာနေတဲ့ အရပ်သားတဦးကို အကြမ်းဖက်သမားတွေသေနတ်နဲ့ပစ်ခတ်ခဲ့လို့ ဒဏ်ရာရသွားခဲ့ပါတယ်။
အဲဒီမောင်တောမြို့နယ်၊ ခြံပြင်ရွာမှ အသက်လေးဆယ်အရွယ် ဦးမောင်မောင်ကြီး၊ ဦးဘိုဝင်းထွန်းနဲ့ဒေါ်အဘုတို့သုံးဦးဟာ သြဂုတ်လ ၂၄ ရက်နေ့၊မနက်က စက်လှေနဲ့ငါးရှာနေချိန် ပစ်ခတ်ခံခဲ့ရတာဖြစ်ပါတယ်။
သူတို့သုံးဦးကိုဘင်္ဂလားဒေ့ရှ်ဘက်ခြမ်းမှ စက်လှေနဲ့ရောက်ရှိလာတဲ့ အကြမ်းဖက်သမားငါးဦးကသေနတ်နဲ့ ခြောက်ချက်ပစ်ခတ်ခဲ့တာပါ။
အဲဒီပစ်ခတ်မှုကြောင့်ဦးမောင်မောင်ကြီးရဲ့ဘယ်ဘက်ပါးနဲ့ နှာခေါင်းမှာသေနတ်ဒဏ်ရာရခဲ့ပါတယ်။
အဲဒီပစ်ခတ်သွားတဲ့ အကြမ်းဖက်သမားတွေကို အာရက္ခတပ်တော်လိုက်လံရှာဖွေရှင်းလင်းနေပါတယ်။
အဲဒီမောင်တောမြို့နယ်မှာ လက်နက်ကိုင်အကြမ်းဖက်သမားတွေဟာ နယ်စပ်ဖြတ်ကျော်အကြမ်းဖက်မှုတွေကျူးလွန်နေကြပါတယ်။
အဲဒါကြောင့်အရပ်သားပြည်သူတွေဟာ ပစ်ခတ်သတ်ဖြတ်ခံရတာတွေ၊ ပြန်ပေးဆွဲခံရတာတွေ၊ ရိုက်နှက်ဖမ်းဆီးခံရတာ တွေမကြာခဏကြုံတွေ့နေကြရပါတယ်။
