Border News Agency
ကနီ၊ မေ ၁၃။
စစ်ကိုင်းတိုင်း၊ ကနီမြို့နယ်မှာ အာဏာသိမ်းစစ်တပ်တပ်ဖွဲ့ဝင် ၅ ဦးအလင်းဝင်လာတယ်လို့ ယင်းမာပင်ခရိုင် PDF ဗျူဟာ ၄၇ မှ မေလ ၁၂ရက်၊ မနေ့ကထုတ်ပြန်ပါတယ်။
အဲဒီယင်းမာပင်မြို့နယ်မှ ကနီမြို့နယ်ကို မေလ၁၀ ရက်နေ့က စစ်ကြောင်းထိုးလာတဲ့စစ်တပ်တပ်ဖွဲ့ဝင် ၅ ဦးဟာ လက်နက်ခဲယမ်းတွေနဲ့အတူ အလင်းဝင်လာခဲ့တာလို့ဆိုပါတယ်။
ဘန့်ဘွေးရွာမှ စစ်တပ်လက်အောက်ခံတပ်မ၃၃နဲ့ ပျူစောထီးစစ်ကြောင်းဟာ ကနီမြို့နယ်၊ တရော်ကျင်းရွာမှတဆင့် ချောင်းမရွာဘက်ကို ဦးတည်ချီတက်လာတဲ့အချိန် တော်လှန်ရေးတပ်ဖွဲ့ဘက်က မိုင်းဆွဲတိုက်ခိုက်ခဲ့တယ်လို့ဆိုပါတယ်။
အဲဒီလိုမိုင်းဆွဲတိုက်ခိုက်ခဲ့တာကြောင့် စစ်တပ်လက်ပါးစေပျူစောထီးခေါင်းဆောင်ရဲ့ ညီဖြစ်သူတဦးနဲ့ စစ်တပ်တပ်ဖွဲ့ဝင် ၁၀ ဦးဒဏ်ရာရသွားခဲ့တယ်လို့ဆိုပါတယ်။
အဲဒီအပြင်အာဏာသိမ်းစစ်တပ်တပ်ဖွဲ့ဝင် ၅ ဦးဟာလည်း ကာကွယ်ရေးတပ်ဖွဲ့တွေနဲ့ချိတ်ဆက်ကာ အလင်းဝင်လာခဲ့ကြတာလို့ ဆိုပါတယ်။
