Border News Agency
ရန်ကုန်၊ နိုဝင်ဘာ ၁၀။
ပြည်သူ့ကာကွယ်ရေးတပ်မတော်၊ အထူးတိုင်းစစ်ဌာနဟာ ပကဖစစ်ကြောင်းသုံးခုကို လက်နက်တွေတပ်ဆင်ပေးခဲ့တယ်လို့ အထူးတိုင်းစစ်ဌာနက နိုဝင်ဘာလ ၁၀ ရက်၊ ဒီနေ့ထုတ်ပြန်ပါတယ်။
အဲဒီအထူးစစ်ဌာနဟာ တိုင်းစစ်ဌာနရဲ့ စစ်ဆင်ရေးကွပ်ကဲမှုကိုခံယူကာ စစ်ဆင်ရေးပူးပေါင်းဆောင်ရွက်နေတဲ့ ရန်ကုန်တိုင်း ပကဖတိုက်ခိုက်ရေးစစ်ကြောင်း၊ မွန်ပြည်ပကဖတိုက်ခိုက်ရေးစစ်ကြောင်းနဲ့ ပဲခူးခရိုင်ပကဖတိုက်ခိုက်ရေးစစ်ကြောင်းတွေကို လက်နက်တပ်ဆင်ပေးခဲ့တာပါ။
အဲဒီလက်နက်တပ်ဆင်ပေးတာကို ပဲခူးတိုင်းရှေ့တန်းစခန်းမှာပြုလုပ်ခဲ့တာဖြစ်ပြီး အထူးတိုင်းစစ်ဌာန၊ တိုင်းကွပ်ကဲရေးမှူးရဲဘော်အောင်စံရှားနဲ့ ဒု-ကွပ်ကဲရေးမှူးရဲဘော်အေးမင်းထွန်းက အဖွင့်အမှာစကားပြောခဲ့တယ်လို့ ဆိုပါတယ်။
အဲဒီအပြင် တိုင်းစစ်ဌာနအရာရှိတွေ၊ နည်းဗျူဟာမှူးတွေကPDF၊ ပကဖပူးပေါင်းစစ်ဆင်ရေးကိစ္စတွေ၊ သတင်းထောက်လှမ်းရေးနဲ့ ထောက်ပို့ကိစ္စတွေဆွေး နွေးခဲ့ကြသလို လက်နက်တွေ၊ ကျည်ဘောက်တွေနဲ့ကျည်ခဲယမ်းတွေပေးအပ်ပြီး သက်ဆိုင်ရာပကဖတာဝန်ရှိသူတွေက ကျေးဇူးတင်စကားပြောခဲ့တယ်လို့ ဆိုပါတယ်။
အဲဒီအထူးတိုင်းစစ်ဌာနဟာ ပြည်သူ့ကာကွယ်ရေးတပ်မတော်၊ စစ်ရုံးချုပ်ရဲ့လမ်းညွှန်ချက်တွေနဲ့အညီ တိုင်းစစ်ဌာနကွပ်ကဲမှုအောက်မှာရှိတဲ့ PDF တပ်ရင်းတွေ၊ လက်ရုံးတပ်ဖွဲ့တွေ၊ ပကဖတွေ၊ ဒေသအခြေပြုကာကွယ်ရေးအဖွဲ့ (LDFs)တွေ စစ်ရေးအရှိန်မြှင့်ဆောင်ရွက်နိုင်ဖို့အတွက် လိုအပ်တဲ့အုပ်ချုပ်ထောက်ပံ့ကိစ္စတွေ ဖြည့်ဆည်းရေးနဲ့COC နှစ်ရပ်နဲ့အညီ အင်အားတွေစုစည်းတည်ဆောက်ရေးအတွက်ပါ ကြိုးပမ်းဆောင်ရွက်နေတယ်လို့လည်းဆိုပါတယ်။
