Border News Agency
နေပြည်တော်၊ ဒီဇင်ဘာ ၂၄။

စစ်ကော်မရှင်တပ်ရဲ့ခုလအတွင်း အသစ်ဖွင့်လှစ်ထားတဲ့ MRTV စာမျက်နှာ နဲ့ MRTV ပို့စ်တွေကို ပြန်ပြီးကူးတင်ဖြန့်ဝေနေတဲ့ MRN စာမျက်နှာတို့ကို ဖယ်ရှားလိုက်ပြီလို့ Justice For Myanmar က ဒီဇင်ဘာလ ၂၄ ရက်၊ ဒီနေ့ထုတ်ပြန်ပါတယ်။

စစ်ကော်မရှင်တပ်က ဝါဒဖြန့်လုပ်ဆောင်နေတဲ့ MRTV နဲ့MRN ကို ဖယ်ရှားပိတ်သိမ်းလိုက်တဲ့ Facebook ရဲ့ မြန်ဆန်တဲ့အရေးယူဆောင်ရွက်မှုကို Justice For Myanmar က ကြိုဆိုတယ်လို့ဆိုပါတယ်။

Facebook ဟာ MITV နဲ့ ရတနာပုံသတင်းစာတွေရဲ့ စာမျက်နှာတွေကို အစောပိုင်းကတည်းက ဖယ်ရှားခဲ့ပြီးဖြစ်သလို၊ YouTube၊ Twitch နဲ့ Kick တွေရဲ့ အရေးယူဆောင်ရွက်မှုတွေလည်း ရှိလာခဲ့ပြီးနောက်မှာ ခုလို MRTV နဲ့ MRN စာမျက်နှာအသစ်တွေကိုပါ ထပ်မံဖယ်ရှားခဲ့တာဖြစ်ပါတယ်။

Facebook ရဲ့ မိခင်ကုမ္ပဏီ Meta ဟာ ၂၀၂၁ ခုနှစ်မှစတင်ပြီး မြန်မာစစ်တပ်၊ စစ်အုပ်စုဆက်နွှယ်စီးပွားရေးလုပ်ငန်းတွေနဲ့ စစ်အုပ်စုထိန်းချုပ်ထားတဲ့ နိုင်ငံပိုင်အဖွဲ့အစည်းတွေနဲ့ မီဒီယာတွေကို Facebook နဲ့ Instagram ပလက်ဖောင်းတွေပေါ်မှာ အသုံးပြုခွင့်ပိတ်ပင်ထားတဲ့မူဝါဒကို ချမှတ်ကျင့်သုံးနေတယ်လို့ဆိုပါတယ်။

နည်းပညာကုမ္ပဏီအားလုံးအနေနဲ့ စစ်ကော်မရှင်တပ်ရဲ့ ဝါဒမှိုင်းဖြန့်အကောင့်တွေကို ဖြုတ်ချဖို့နဲ့ မိမိတို့ပလက်ဖောင်းတွေကို စစ်ကော်မရှင်တပ်က အသုံးပြုနေတာကို ပိတ်ပင်ဖို့ Justice For Myanmar က ဆက်ပြီးတောင်းဆိုထားပါတယ်။