Border News Agency
ကော့ကရိတ်၊ ဇန်နဝါရီ ၁၂။
ကရင်ပြည်၊ကြာအင်းဆိပ်ကြီးမြို့နယ်အခြေစိုက် စစ်ကော်မရှင်တပ်ရဲ့ခလရ ၂၈၃ မှ တပ်သားတဦးဟာ လက်နက်ခဲယမ်းနဲ့အတူ ဖီးနစ် – အထူးစစ်ဆင်ရေးတပ်ဖွဲ့ဆီဆီအလင်းဝင်ရောက်လာတယ်လို့ ဇန်နဝါရီလ ၁၂ ရက်၊ မနေ့ကထုတ်ပြန်ပါတယ်။
အဲဒိီအလင်းဝင်လာတဲ့ တပ်သားအောင်ကိုကိုဟာ ဇန်နဝါရီ ၈ ရက်၊ညပိုင်းမှာ KNLA တပ်မဟာ ၆ ဆီကို ဆက်သွယ်ခိုလှုံလာခဲ့တာဖြစ်ပြီး MA-3သေနတ်တလက်နဲ့ ကျည်ဆန်တရာ့နှစ်ဆယ်ကို တပါတည်း ယူလာတယ်လို့ဆိုပါတယ်။
စစ်ကော်မရှင်တပ်ရဲ့ ဖိနှိပ်ချုပ်ချယ်မှုတွေကို မကြိုက်တာကြောင့် ခုလို ဘက်ပြောင်းခိုလှုံလာတာဖြစ်ပြီး ပြည်သူနဲ့အတူ ရပ်တည်ခဲ့တဲ့အတွက် သူ့ကိုဂုဏ်ပြုငွေကျပ်သိန်းသုံးဆယ်ပေးအပ်ချီးမြှင့်ခဲ့တယ်လို့ ဆိုပါတယ်။
အဲဒီအလင်းဝင်လာတဲ့တပ်သားကို လုံလုံခြုံခြုံ ထိန်းသိမ်းစောင့်ရှောက်ထားပြီး သူကိုယ်တိုင်ကလည်း စစ်ကော်မရှင်ကို ပြန်တိုက်ဖို့ဆန္ဒရှိနေတယ်လို့ ဆိုပါတယ်။
အဲဒီ ဖီးနစ် – အထူးစစ်ဆင်ရေးတပ်ဖွဲ့အနေနဲ့ နောက်ထပ် အလင်းဝင်လိုသူတွေကိုလည်း နွေးနွေးထွေးထွေး ကြိုဆိုသွားမှာဖြစ်သလို နိုင်ငံတကာဥပဒေတွေနဲ့အညီ လုံခြုံစွာစောင့်ရှောက်ပေးသွားမယ်လို့ အသိပေးထားပါတယ်။
