Border News Agency
မုံရွာ၊ ဇန်နဝါရီ ၁၉။
စစ်ကိုင်းတိုင်း၊ မုံရွာမြို့နယ်၊ တောင်မတောကျေးရွာဘုန်းကြီးကျောင်းကို ဇန်နဝါရီလ ၁၆ ရက်နေ့မှာ စစ်ကော်မရှင်တပ် Gyrocopter တွေနဲ့ တိုက်ခိုက်လို့သံဃာတော်တပါးပျံလွန်တော်မူခဲ့ပြီး သံဃာသုံးပါးလည်း ဒဏ်ရာပြင်းပြင်းထန်ထန်ရသွားတယ်လို့ ဒေသခံတွေက ဆိုကြပါတယ်။
အဲဒီတောင်မတောကျေးရွာဘုန်းကြီးကျောင်းကို ဇန်နဝါရီလ ၁၆ ရက်၊ မနက်အစောက ဆည်ကြီးတောရွာကနေတဆင့် သစ်ညိုပင်ရွာထဲကို စီးနင်းဝင်ရောက်ခဲ့ပြီး ပြည်သူပိုင်နေအိမ်နှစ်ဆယ်ကျော်ကို မီးရှို့ဖျက်ဆီးခဲ့တယ်လို့ ဆိုပါတယ်။
အဲဒီအိမ်တွေကို မွှေနှောက်ပြီးပြည်သူတွေရဲ့ ငွေကျပ်သိန်းတထောင်ကျော်ကိုလည်း လုယက်ယူသွားခဲ့ကြတယ်လို့ ဆိုကြပါတယ်။
အဲဒီအပြင် ရွာသားငါးဦးကိုလည်းဖမ်းဆီးပြီး ဝိုင်းဖွဲ့ရိုက်နှက်ခဲ့ကြတာကြောင့် ဒဏ်ရာပြင်းပြင်းထန်ထန်ရသွားတာမို့ ဆေးကုသမှုခံယူနေရတယ်လို့ ဆိုကြပါတယ်။
စစ်ကော်မရှင်တပ်ဟာ သစ်ညိုပင်ရွာကိုစီးနင်းနေတဲ့အချိန်မှာပဲ တောင်မတောရွာကိုလေကြောင်းကနေပါ တပြိုင်နက်တည်းတိုက်ခိုက်ခဲ့တာ ဖြစ်ပါတယ်။
အဲဒီတောင်မတောရွာကို ဇန်နဝါရီလ ၁၇ ရက်၊ မနက် ၄ နာရီခန့်မှာလည်း အသေခံဒရုန်းတွေနဲ့ တိုက်ခိုက်ခဲ့တာကြောင့် နေအိမ်ခြောက်လုံး ထပ်ပြီးမီးလောင်ခဲ့ရပါတယ်။
စစ်ကော်မရှင်တပ်ဟာ အခုနောက်ပိုင်းမှာ ပြည်သူတွေကိုပစ်မှတ်ထားပြီး လေကြောင်းနဲ့ မြေပြင်တိုက်ခိုက်မှုတွေကို နေ့စဥ်လုပ်လာနေတာပါ။
အဲဒါကြောင့် ပြည်သူတွေအနေနဲ့ တော်လှန်ရေးအင်အားစုတွေရဲ့ ထုတ်ပြန်ချက်တွေကို ဂရုတစိုက်နားထောင်ပြီး အသိရှိရှိနေထိုင်ကြဖို့ မုံရွာမြို့နယ် ပလဖ အဖွဲ့ကအသိပေးထားပါတယ်။
