Border News Agency
မန္တလေး၊ ဇန်နဝါရီ ၂၅။
စစ်ကော်မရှင်က ကျင်းပနေတဲ့ရွေးကောက်ပွဲကို နိုင်ငံတကာကအသိအမှတ်ပြုတာ မပြုတာထက် ပြည်သူတွေရဲ့မဲကို အသိအမှတ်ပြုသွားမှာလို့ စစ်ခေါင်းဆောင်မင်းအောင်လှိုင်က ဇန်နဝါရီလ ၂၅ ရက်မှာ၊ ဒီနေ့မှာ ပြောဆိုလိုက်ပါတယ်။
မန္တလေးမြို့ပေါ်ရှိမဲရုံတွေကို လိုက်လံကြည့်နေချိန် စစ်ခေါင်းဆောင်က “နိုင်ငံခြားက အသိအမှတ်ပြုတာ၊ မပြုတာကျွန်တော်တို့ နားမလည်ဘူး။ ပြည်သူကမဲပေးတာ ကျွန်တော်တို့ အသိအမှတ်ပြုမယ်။ ဒီလိုပဲသွားရမယ်” လို့ ပြောကြားခဲ့တာပါ။
အဲဒီမဲလာမပေးသူတွေဟာ လုံခြုံရေးကြောင့်ဖြစ်စေ သူတို့နှစ်သက်တဲ့ကိုယ်စားလှယ်မပါလို့ဖြစ်စေ မလာနိုင်ကြတာလို့လည်း သူကဆိုပါတယ်။
စစ်ကော်မရှင်ရဲ့ ရွေးကောက်ပွဲနဲ့ပတ်သက်လို့ အာဆီယံအလှည့်ကျဥက္ကဋ္ဌ ဖိလစ်ပိုင်နိုင်ငံမှ ခန့်အပ်ထားတဲ့ မြန်မာနိုင်ငံဆိုင်ရာအထူးကိုယ်စားလှယ်က ထောက်ခံမှာမဟုတ်ကြောင်း ပြောဆိုထားပါတယ်။
အဲဒီအပြင် မလေးရှားနိုင်ငံခြားရေးဝန်ကြီးကလည်း အသိအမှတ်ပြုမှာမဟုတ်ဘူးလို့ ကြိုတင်ထုတ်ဖော်ပြောဆိုထားပါတယ်။
စစ်ကော်မရှင်ဘက်ကတော့ ဒီရွေးကောက်ပွဲဟာ မြန်မာလူထုကို ဗဟိုပြုတာဖြစ်လို့နိုင်ငံတကာကကျေနပ်တာ ရှိ၊ မရှိ အရေးမကြီးဘူးလို့ ဆိုပါတယ်။
နိုင်ငံတစ်ဝှမ်းတိုက်ပွဲတွေကြောင့် မြို့ပေါ်ဒေသအချို့မှာသာ အပိုင်းလိုက်ခွဲကျင်းပနေရတဲ့ရွေးကောက်ပွဲဟာ စစ်ကော်မရှင်အတွက် နိုင်ငံရေးထွက်ပေါက်ရှာတဲ့ လုပ်ရပ်သာဖြစ်တယ်လို့ နိုင်ငံရေးလေ့လာသူတွေက ဆိုကြပါတယ်။
အဲဒီအပြင်တဖက်မှာလည်း တော်လှန်ရေးအင်အားစုတွေက ပြည်သူတွေမဲမပေးကြဖို့တိုက်တွန်းထားပြီး မဲရုံလုံခြုံရေးယူထားတဲ့ စစ်ကော်မရှင်တပ်နဲ့ ပျူစောထီးတွေကို ဆက်တိုက်တိုက်ခိုက်နေပါတယ်။
အဲဒီ ၂၀၂၀ ရွေးကောက်ပွဲရလဒ်ကိုပယ်ဖျက်ကာ အာဏာသိမ်းခဲ့တဲ့စစ်တပ်ဟာ ခုအခါ သူတို့ကျောထောက်နောက်ခံပြုပါတီ အနိုင်ရဖို့အတွက် ရွေးကောက်ပွဲကို အကောင်အထည်ဖော်နေတာလို့ နိုင်ငံတကာက ရှုမြင်နေကြပါတယ်။
