Border News Agency
ဝါရှင်တန်၊ ဇန်နဝါရီ ၂၇ ။
အမေရိကန်နိုင်ငံတဝှမ်းမှာ ဇန်နဝါရီလ၂၃ ရက်နေ့ကတည်းက တိုက်ခိုက်နေတဲ့ ပြင်းထန်တဲ့နှင်းမုန်တိုင်းကြောင့် ဒီနေ့မနက်ပိုင်းအထိ သေဆုံးသူလေးဆယ့်ကိုးဦးရှိလာပြီး ပြည်နယ်နှစ်ဆယ်ခုမှာ အရေးပေါ်အခြေအနေ ကြေညာထားရပါတယ်။
အဲဒီသေဆုံးသူအများစုဟာ မက်ဆာချူးဆက်၊ အိုဟိုင်းယိုး၊ တက္ကဆက်နဲ့ နယူးယောက်ပြည်နယ်တွေကဖြစ်ပြီး အအေးလွန်ကဲလို့ အသက်ရှူလမ်းကြောင်းဆိုင်ရာပြဿနာဖြစ်တာနဲ့ လမ်းချော်ပြီးယာဉ်မတော်တဆဖြစ်တာတွေကြောင့် သေဆုံးခဲ့ရတာပါ။
အဲဒီမုန်တိုင်းကြောင့် လေကြောင်းခရီးစဉ်ပေါင်း တသောင်းလေးထောင်ကျော်ဖျက်သိမ်းခဲ့ရသလို ဒီနေ့မှာလည်း ဝါရှင်တန်ကရေဂင်အမျိုးသားလေဆိပ်မှာ နှင်းတွေဖုံးနေလို့ လေယာဉ်ခရီးစဉ်အားလုံးနီးပါး ရပ်ဆိုင်းထားရပါတယ်။
အဲဒါဟာကိုဗစ်နောက်ပိုင်း လေကြောင်းလိုင်းတွေအတွက် အဆိုးရွားဆုံးအကျပ်အတည်းလည်း ဖြစ်နေပါတယ်။
အဲဒီအပြင် တန်နက်ဆီ၊ မစ္စစ္စပီနဲ့ လူဝီစီးယားနားပြည်နယ်တွေမှာ လျှပ်စစ်မီးတွေပြတ်တောက်နေလို့ လူပေါင်းတသန်းနီးပါး ဒုက္ခရောက်နေကြပါတယ်။
အမေရိကန်မိုးလေဝသဌာန (NWS) ရဲ့ ထုတ်ပြန်ချက်အရ မုန်တိုင်းကအရှေ့ဘက်ကို ရွေ့သွားပေမယ့် “Arctic Blast” လို့ခေါ်တဲ့ အာတိတ်အအေးလှိုင်းက ဖေဖော်ဝါရီလဆန်းပိုင်းအထိ ဆက်ရှိနေဦးမယ်လို့ ဆိုပါတယ်။
အဲဒီအပြင် အိမ်နီးချင်းကနေဒါနိုင်ငံ အွန်တေးရီးယိုးပြည်နယ်မှာလည်း အပူချိန်ကအနုတ်လေးဆယ်ဒီဂရီဆဲလ်စီးယပ်စ်အထိကျဆင်းနေပြီး နှင်းထုက ၂ ပေလောက်အထိ စံချိန်တင် ကျဆင်းနေလို့ နယ်စပ်သယ်ယူပို့ဆောင်ရေးတွေ အားလုံးနီးပါးရပ်တန့်နေတယ်လို့ သိရပါတယ်။
