Border News Agency
ကစယ်ဒို၊ မတ်လ ၄။
တနင်္သာရီတိုင်း၊ ကစယ်ဒိုမြို့နယ်မှာ စစ်ကော်မရှင်တပ်လေကြောင်းတိုက်ခိုက်လို့ တလအတွင်း အရပ်သားရှစ်ဦးသေဆုံးပြီး ဆယ်ဦးဒဏ်ရာရသွားတယ်လို့ ကရင်အမျိုးသားအစည်းအရုံးမှ မတ်လ ၄ရက်၊ ဒီနေ့ထုတ်ပြန်ပါတယ်။
ကစယ်ဒိုမြို့နယ်အတွင်းရှိ ကျေးရွာတွေကို စစ်ကော်မရှင်တပ်မှ ဖေဖော်ဝါရီလ ၁၁ ရက်နေ့ မှ ဖေဖော်ဝါရီလ၂၇ ရက်နေ့အထိ လေကြောင်းတိုက်ခိုက်တာတွေ နေ့စဉ်ပြုလုပ်ခဲ့တယ်လို့ ဆိုပါတယ်။
ကစယ်ဒိုမြို့နယ်၊ စုံစင်ဖျားကျေးရွာ၊ မင်းဒပ်ကျေးရွာ၊ ကနက်သီရိကျေးရွာ၊ ပြင်းဖြူသားကျေးရွာ၊ ဝင်းဝကျေးကျေးရွာ၊ ရငဲကျေးရွာ၊ ချောက်ချောင်းကျေးရွာတွေကို စစ်ကော်မရှင်တပ်မှ လေကြောင်းတိုက်ခိုက်မှုပြုလုပ်ခဲ့တာလို့ ဆိုပါတယ်။
အဲဒီကျေးရွာတွေကို စစ်ကော်မရှင်တပ်မှ Y-12 အမျိုးအစား လေယာဉ်နဲ့ ၂၈ကြိမ်၊ ဂျက်ဖိုက်တာနဲ့ ၈ ကြိမ်ဗုံးကြဲချတိုက်ခိုက်ခဲ့တယ်လို့ ဆိုပါတယ်။
အဲဒီလိုလေကြောင်းတိုက်ခိုက်ခဲ့တာကြောင့် အရပ်သားတဦးသေဆုံးခဲ့သလို ဆယ်ဦးဒဏ်ရာရသွားခဲ့ပြီး နေအိမ်ဆယ့်တလုံး ထိခိုက်ပျက်စီးခဲ့ရတယ်လို့ ဆိုပါတယ်။
အဲဒီအပြင် ကစယ်ဒိုမြို့နယ်အတွင်း စစ်ကော်မရှင်တပ် ခလရ-၄၀၉မှ အရပ်သားခုနှစ်ဦးကို ဖမ်းဆီးသတ်ဖြတ်ခဲ့တယ်လို့ ဆိုပါတယ်။
နောက်ပြီးလေကြောင်းတိုက်ခိုက်မှုတွေနဲ့ လူ့အခွင့်အရေးချိုးဖောက်မှုတွေကို စစ်ကော်မရှင်တပ်မှ ဆက်လက်ကျူးလွန်နေတာကြောင့် ဒေသခံပြည်သူတွေရဲ့ လုံခြုံရေးနဲ့အသက်အိုးအိမ်တွေ ထိခိုက်ပျက်စီးမှုတွေရှိနေပြီး ဒေသခံပြည်သူ ၅၀၀ ထပ်မနည်း ဘေးလွတ်ရာကို ထွက်ပြေးတိမ်းရှောင်နေကြရတယ်လို့ ဆိုပါတယ်။
