Border News Agency
ကစယ်ဒို၊ မတ် ၁၅။
တနင်္သာရီတိုင်း၊ ကစယ်ဒိုမြို့နယ်၊ ဘန်းချောင်းကျေးရွာကို ဗိုလ်စောအယ်ခွီး(ခ)ကော်လာဖိုး ဦးဆောင်တဲ့ KTLA တပ်ဖွဲ့မှ တော်လှန်ရေးမဟာမိတ် ဗထူးတပ်ဖွဲ့တွေကိုတိုက်ခိုက်လို့ ခြောက်ဦးသေဆုံးသွားတယ်လို့ KNU မှ မတ်လ ၁၅ရက်၊ ဒီနေ့ထုတ်ပြန်ပါတယ်။
KTLA တပ်ဖွဲ့တွေဟာ မတ်လ ၁၄ ရက်၊ ညနေ ၃ နာရီအချိန်ခန့်က ဟင်းကပိကျေးရွာနဲ့ပျားသားချောင်းကျေးရွာကြားမှာ မောတောင်စစ်ဆင်ရေးမှပြန်လာတဲ့ တော်လှန်ရေးမဟာမိတ် ဗထူးတပ်ဖွဲ့တွေကိုတိုက်ခိုက်ခဲ့တာပါ။
အဲဒီလိုတိုက်ခိုက်ခဲ့တာကြောင့် ဗထူးတပ်ဖွဲ့မှတပ်သားလေးဦးသေဆုံးသွားသလို သုံးဦးဒဏ်ရာရရှိသွားခဲ့ပြီး တပ်သားနှစ်ဦးပျောက်ဆုံးသွားခဲ့တယ်လို့ ဆိုပါတယ်။
အဲဒီပျောက်ဆုံးနေတဲ့ဗထူးတပ်ဖွဲ့မှ ရဲဘော်နှစ်ဦးကို ပြန်လည်ရှာဖွေတွေ့ရှိချိန်မှာ ရက်ရက်စက်စက်သတ်ဖြတ်ခံထားရတာကို တွေ့ရှိခဲ့တယ်လို့ဆိုပါတယ်။
တိုက်ခိုက်ခံရတဲ့တပ်ဖွဲ့ဝင်တွေဟာ စစ်ကော်မရှင်တပ်ရဲ့မောတောင်ဗျူဟာစခန်းကိုသိမ်းပိုက်ရရှိမှုအပြီး နောက်တန်းပြန်လာတဲ့လမ်းမှာ KTLAတပ်ဖွဲ့တွေက ခြုံခိုတိုက်ခိုက်ခဲ့တာလို့ ဆိုပါတယ်။
KTLA တပ်ဖွဲ့ဝင်တွေရဲ့လုပ်ရပ်ဟာ တနေ့တခြားပိုမိုဆိုးရွာလာပြီး စစ်ကော်မရှင်တပ်ရဲ့ လက်အောက်ခံတပ်ဖွဲ့တခုလို တော်လှန်ရေးတပ်ဖွဲ့တွေကို ရန်သူအဖြစ်သတ်မှတ်ကာ နေ့စဥ်နဲ့အမျှတိုက်ခိုက်နေတယ်လို့ ဆိုပါတယ်။
