Border News Agency
ဝါရှင်တန်၊ မတ် ၁၇ ။
ဟော်မုဇ်ရေလက်ကြားမှာ ကင်းလှည့်ဖို့နဲ့ရေမိုင်းရှင်းဖို့ အမေရိကန်ရဲ့တောင်းဆိုချက်ကို နေတိုး(NATO)အဖွဲ့ဝင်တွေနဲ့ မဟာမိတ်နိုင်ငံတွေကငြင်းဆန်လိုက်တဲ့အပေါ် သမ္မတထရန့်ကဒေါသတကြီးတုံ့ပြန်လိုက်ပါတယ်။
ဒီလိုငြင်းဆန်မှုဟာ နေတိုးအဖွဲ့ရဲ့အနာဂတ်အပေါ် ဆိုးရွားစွာသက်ရောက်လိမ့်မယ်လို့ ထရန့်က Financial Times နဲ့ အင်တာဗျူးမှာသတိပေးခဲ့တာပါ။
အမေရိကန်ဟာ ဥရောပအတွက်ယူကရိန်းစစ်ပွဲမှာ အများကြီးကူညီခဲ့ပြီးပြီဖြစ်လို့ အခုအချိန်မှာဥရောပဘက်က တာဝန်ယူရမယ့်အလှည့်ဖြစ်တယ်လို့ ထရန့်က ဆိုပါတယ်။
အထူးသဖြင့် ရေနံအဓိကတင်သွင်းနေတဲ့ တရုတ်နဲ့ဥရောပနိုင်ငံတွေအနေနဲ့ အခမဲ့အကျိုးအမြတ်ရယူနေတာမျိုးကိုရပ်တန့်ပြီး ကိုယ့်စွမ်းအင်လမ်းကြောင်းကို ကိုယ်တိုင်ကာကွယ်ကြဖို့ ပြင်းပြင်းထန်ထန်ဝေဖန်ခဲ့ပါတယ်။
ဗြိတိန်၊ ဂျာမနီ၊ ပြင်သစ်နဲ့ဂျပန်တို့အပါအဝင် မဟာမိတ်နိုင်ငံတွေကတော့ စစ်ပွဲထဲမပါဝင်ချင်တာနဲ့ ဖွဲ့စည်းပုံအခြေခံဥပဒေအကန့်အသတ်တွေကြောင့် အမေရိကန်ရဲ့စစ်ရေးတောင်းဆိုမှုကို အသီးသီးငြင်းဆိုခဲ့ကြပါတယ်။
သမ္မတထရန့်ကတော့ “သူတို့အခုလိုလုပ်တာကို ငါတို့မှတ်ထားမယ်”လို့ ပြောကြားခဲ့ပြီး ဒီအခြေအနေဟာအမေရိကန်ရဲ့ ရှေ့ဆက်မယ့်နိုင်ငံခြားရေးမူဝါဒတွေအပေါ် အပြောင်းအလဲဖြစ်လာနိုင်ပါတယ်။
