Border News Agency
ကျောက်ဖြူ၊ မတ် ၁၉။
ကျောက်ဖြူမြို့နယ်မှာ စစ်ကော်မရှင်တပ် ဒရုန်း၊ လက်နက်ကြီး၊ လေကြောင်းမှတိုက်ခိုက်လို့ စစ်ဘေးရှောင်တဦးသေဆုံးသွားတယ်လို့ သိရပါတယ်။
အဲဒီကျောက်ဖြူမြို့နယ်၊ ချောင်းမြောင်ရွာကနေဒိုးချောင်းရွာမှာ စစ်ဘေးရှောင်နေတဲ့အသက်ခြောက်ဆယ်အရွယ် ဦးတင်ထီးခိုင်သေဆုံးသွားတာပါ။
ဒိုးတောင်ရွာကို မတ် ၁၈ ရက်၊ ၆ နာရီ ၁၆မိနစ်အချိန်ခန့်က စစ်ကော်မရှင်တပ်မှတိုက်လေယာဉ်တစီးနဲ့ ဗုံးနှစ်လုံးကြဲချတိုက်ခဲ့တယ်လို့ဆိုပါတယ်။
အဲဒီလိုတိုက်ခိုက်ခဲ့တာကြောင့် ဒိုးချောင်းရွာမှာစစ်ဘေးရှောင်နေတဲ့ ဦးတင်ထီးခိုင်မှာခန္ဓာကိုယ်အနှံ့ ဗုံးစထိမှန်ပြီးသေဆုံးသွားတယ်လို့ ဆိုပါတယ်။
အဲဒီနောက် ညနေ ၆ နာရီ ၅မိနစ်အချိန်ခန့်ကလည်း အသေခံဒရုန်းတစီးဟာ ဒိုးတောင်ရွာကိုထပ်မံတိုက်ခိုက်ခဲ့တာကြောင့် လူနေအိမ်နှစ်လုံးထိခိုက်ပျက်စီးသွားတယ်လို့ ဆိုပါတယ်။
အဲဒီအပြင်ငအုပ်ရွနဲ့ဝမျှောင်ရွာကြားရှိ စစ်ကော်မရှင်တပ်ရဲ့ ရေတပ်စစ်သင်္ဘောတွေကဒိုးတောင်ရွာကို လက်နက်ကြီးသုံးကြိမ်အထိပစ်ခတ်တိုက်ခဲ့တယ်လို့ ဆိုပါတယ်။
စစ်ကော်မရှင်တပ်ဟာ ကျောက်ဖြူအပါအဝင်အာရက္ခတပ်တော်ထိန်းချုပ်ထားတဲ့မြို့တွေကို စစ်သင်္ဘောတွေက လက်နက်ကြီး၊ လေယာဉ်တွေနဲ့ဆက်တိုက်ပစ်ခတ်နေလို့ ပြည်သူတွေအတွက် အန္တရာယ်အမြင့်ဆုံးဖြစ်နေတယ်လို့ အာရက္ခတပ်တော်က ဆိုပါတယ်။
လူနေထူထပ်တဲ့ အရပ်သားပြည်သူတွေနေထိုင်ရာနေရာ၊ စာသင်ကျောင်း၊ ဆေးရုံ၊ ဆေးခန်းနဲ့ သာသနိကအဆောက်အအုံတွေကို စစ်ကော်မရှင်တပ်ရည်ရွယ်ချက်ရှိရှိရေကြောင်း၊ လေကြောင်းကတိုက်ခိုက်မှုပြုလုပ်နေတယ်လို့ ဆိုပါတယ်။
အဲဒါကြောင့် ပင်လယ်ကမ်းနီးမြို့၊ ရွာတွေကမိဘပြည်သူတွေဟာ စစ်ကော်မရှင်တပ်ရေကြောင်း၊ လေကြောင်းတိုက်ခိုက်မှုအန္တရာယ်ကို အထူးသတိထားကြပြီး စစ်ရေးသတိရှိဖို့အသိပေးထားပါတယ်။
