Border News Agency
လေဘနွန်၊ မတ် ၂၅။
လေဘနွန်အစိုးရဟာ ဘေရွတ်မြို့မှာရှိတဲ့ အီရန်သံအမတ်ကြီး မိုဟာမက် ရေဇာရှေးဘာနီကို “လက်မခံနိုင်တဲ့ပုဂ္ဂိုလ်”အဖြစ် သတ်မှတ်လိုက်ပြီး လာမယ့် မတ်လ ၂၉ ရက်နေ့နောက်ဆုံးထားကာ နိုင်ငံအတွင်းကနေ ထွက်ခွာဖို့ အမိန့်ထုတ်ပြန်လိုက်ပါတယ်။
ဝန်ကြီးချုပ် နာဝပ်ဖ် စလမ် ဦးဆောင်တဲ့ လေဘနွန်အစိုးရဟာ အီရန်သံအမတ်ကြီးရဲ့ သံတမန်အခွင့်အရေးတွေကို ချက်ချင်းရုပ်သိမ်းလိုက်သလို အီရန်နိုင်ငံမှာရှိတဲ့လေဘနွန်သံအမတ်ကြီးကိုလည်း ကန့်ကွက်တဲ့အနေနဲ့ နေရပ်ကို ချက်ချင်းပြန်ခေါ်လိုက်တာပါ။
အဲဒါဟာ အီရန်ဘက်က လေဘနွန်ရဲ့ ပြည်တွင်းရေးကို အစဉ်တစိုက်စွက်ဖက်နေတာနဲ့ သံတမန်ကျင့်ဝတ်တွေကို ပြင်းပြင်းထန်ထန် ချိုးဖောက်နေတာတွေကြောင့် အခုလို အပြတ်အသတ် အရေးယူလိုက်တာလို့ လေဘနွန်နိုင်ငံခြားရေးဝန်ကြီးဌာနက ဆိုပါတယ်။
နိုင်ငံတကာသတင်းဌာနတွေရဲ့ ဖော်ပြချက်အရ အခုလိုသံတမန်နှင်ထုတ်တာဟာ ဒေသတွင်းမှာရှိတဲ့ အီရန်ရဲ့သြဇာလွှမ်းမိုးမှုနဲ့ဟစ်ဇ်ဘိုလာအဖွဲ့အပေါ် ထောက်ပံ့နေတာတွေကို ဖြတ်တောက်ဖို့ ကြိုးစားတဲ့ သံတမန်ရေးရာ အမြင့်ဆုံး တုံ့ပြန်မှုတခုလည်း ဖြစ်တယ်လို့ဆိုပါတယ်။
ဒီဖြစ်ရပ်ဟာ လေဘနွန်နဲ့ အီရန်အကြား ဆယ်စုနှစ်များစွာအတွင်း အဆိုးရွားဆုံး သံတမန်ရေးရာ တင်းမာမှုဖြစ်ပြီး ဒီအပေါ်မှာ အီရန်အစိုးရဘက်က ဘယ်လိုမျိုး ပြန်လည်တုံ့ပြန်လာမလဲဆိုတာကို ကမ္ဘာ့နိုင်ငံတွေက စောင့်ကြည့်နေကြပါတယ်။
