Border News Agency
ကျောက်တော်၊ မတ် ၂၉။
ကျောက်တော်မြို့နယ်၊ ကျားနင်းကန်ကျေးရွာမှာ အသက် ၉ နှစ်အရွယ်ကလေးငယ်တဦး ရေနစ်သေဆုံးသွားတယ်လို့ သိရပါတယ်။
အဲဒီရေနစ်သေဆုံးသူဟာ ကျားနင်းကန်ရွာက ဦးမင်းကျော်နိုင်ရဲ့သား မောင်မျိုးမင်းဦးဖြစ်ပါတယ်။
သူဟာမတ်လ ၂၇ ရက်၊ညနေပိုင်းကတည်းက နေအိမ်ကနေ ပျောက်ဆုံးသွားခဲ့တာပါ။
မတ်လ ၂၈ ရက်၊မနက်ပိုင်းမှာတော့ ရွာရဲ့တောင်ဘက်ကရေကန်ပျက်ကြီးတခုထဲမှာ မောင်မျိုးမင်းဦးကို သေဆုံးပြီးပြန်လည်တွေ့ရှိခဲ့တာ ဖြစ်ပါတယ်။
အဲဒီကလေးငယ်ရဲ့ ရုပ်အလောင်းကို သက်ဆိုင်ရာက လာရောက်စစ်ဆေးနေပြီး မှုခင်းဆေးစာတွေ ပေးပို့ဖို့အတွက် စီစဉ်ဆောင်ရွက်နေတယ်လို့ သိရပါတယ်။
ကျောက်တော်မြို့နယ်၊အပေါက်ဝရွာမှာလည်း မတ်လ ၁၇ ရက်နေ့က ကုလားတန်မြစ်အတွင်း အမျိုးသမီးနှစ်ဦးရေနစ်သေဆုံးခဲ့ပါတယ်။
အဲဒီ ရေနစ်သေဆုံးသွားသူတွေဟာအပေါက်ဝရွာ၊ရင်းဒါးရပ်ကွက်က မရွှေဇင်ဦးနဲ့ မမေဇူလှိုင်တို့ ဖြစ်ကြပါတယ်။
အာရက္ခဒေသအတွင်းမှာ မြစ်ချောင်းအင်းအိုင်တွေ ပေါများပြီး တချို့နေရာတွေမှာ ရေစီးသန်တာကြောင့် ဒေသခံတွေအနေနဲ့ မြစ်ကမ်းနားတွေမှာ သွားလာတာ၊ရေချိုးတာတွေလုပ်တဲ့အခါ အထူးဂရုစိုက်ကြဖို့ ဒေသဆိုင်ရာ အာဏာပိုင်တွေက သတိပေးနှိုးဆော်ထားပါတယ်။
