Border News Agency
ဟိုင်ဖာ၊ ဧပြီ ၆ ။
အစ္စရေးနိုင်ငံမြောက်ပိုင်း ဟိုင်ဖာမြို့ရှိ ၇ ထပ်ပါ လူနေအဆောက်အအုံတခုကို ဧပြီလ ၅ ရက်နေ့မှာ အီရန်တပ်ဖွဲ့က ထိပ်ဖူးအလေးချိန် ၄၅၀ ကီလိုဂရမ်ပါ တာလတ်ပစ် ဒုံးကျည်နဲ့ပစ်ခတ်တိုက်ခိုက်ခဲ့တယ်လို့ ဒေသတွင်းမီဒီယာတွေမှာဖော်ပြပါတယ်။
အဲဒီဒုံးကျည်ထိမှန်လို့ အဆောက်အအုံရဲ့ ထက်ဝက်ခန့် ပြိုကျပျက်စီးသွားပြီး ပြင်းထန်တဲ့ မီးလောင်ကျွမ်းမှုတွေ ဖြစ်ပွားခဲ့တာကြောင့် အဆောက်အအုံတခုလုံးပြိုကျမယ့်အန္တရာယ်နဲ့ ရင်ဆိုင်နေရတယ်လို့ဆိုပါတယ်။
အဲဒီတိုက်ခိုက်မှုကြောင့် အသက် ၈၂ နှစ်အရွယ် အမျိုးသားကြီးတဦးဒဏ်ရာရခဲ့သလို ၁၀ လအရွယ် ကလေးငယ်တဦးအပါအဝင် စုစုပေါင်း ၄ ဦး ဒဏ်ရာရရှိကာ ဆေးရုံကို အရေးပေါ် ပို့ဆောင်ထားရတယ်လို့ဆိုပါတယ်။
အဆောက်အအုံရဲ့အောက်ထပ်အပျက်အစီးပုံတွေအောက်မှာ ပြည်သူ ၃ ဦးထက်မနည်းပိတ်မိနေဆဲဖြစ်လို့ အစ္စရေးကယ်ဆယ်ရေးအဖွဲ့တွေကရှာဖွေရေးတွေ လုပ်ဆောင်နေတယ်လို့ဆိုပါတယ်။
