Border News Agency
ဆိုးလ်၊ ဧပြီ ၉။
စစ်ကော်မရှင်တပ်က အတုအယောင် ရွေးကောက်ပွဲကနေတဆင့် အာဏာတည်မြဲဖို့ ကြိုးပမ်းနေတာတွေကို ကန့်ကွက်ရှုတ်ချတဲ့ သတင်းစာရှင်းလင်းပွဲကို တောင်ကိုရီးယားနိုင်ငံ၊ ဆိုးလ်မြို့မှာ ဧပြီ ၇ ရက်နေ့က ပြုလုပ်ခဲ့ပါတယ်။
အဲဒီသတင်းစာရှင်းလင်းပွဲကို ဆိုးလ်မြို့ရှိ စစ်ကော်မရှင်တပ်လက်အောက်ခံ မြန်မာသံရုံးရှေ့မှာ ကျင်းပခဲ့တာဖြစ်ပြီး မြန်မာ့ဖက်ဒရယ်ဒီမိုကရေစီအောင်တိုင်ရေးအဖွဲ့ချုပ် (MFDMC) နဲ့ ကိုရီးယားအရပ်ဘက်အဖွဲ့အစည်း ၁၀၆ ဖွဲ့တို့ ပူးပေါင်းဆောင်ရွက်ခဲ့တာပါ။
စစ်ကော်မရှင်တပ်ရဲ့ တရားမဝင်တဲ့ လုပ်ရပ်တွေကို ကိုရီးယားအစိုးရနဲ့ ပြည်သူတွေအပြင် နိုင်ငံတကာကပါ ပိုမိုသိရှိလာစေဖို့ ရည်ရွယ်တာဖြစ်ပြီး စစ်ခေါင်းဆောင်ဟာ ပြည်သူတင်မြှောက်တဲ့ သမ္မတမဟုတ်ကြောင်းကိုလည်း ပြင်းပြင်းထန်ထန် ထုတ်ဖော်ပြောဆိုခဲ့ကြပါတယ်။
ဒီလအတွင်းမှာပဲ ကိုရီးယားလွှတ်တော်နဲ့ အစိုးရတို့ သိရှိစေဖို့အတွက် ဆန္ဒပြပွဲတွေနဲ့ သတင်းစာရှင်းလင်းပွဲတွေကို အင်တိုက်အားတိုက် ဆက်လက်ပြုလုပ်သွားဖို့ ရှိတယ်လို့ MFDMC က ဆိုပါတယ်။
ဒါ့အပြင် စစ်ကော်မရှင်တပ်ကို အစိုးရတရပ်အဖြစ် အသိအမှတ်မပြုဖို့အတွက်လည်း တောင်ကိုရီးယားအစိုးရထံ ဆက်လက်တောင်းဆိုသွားမယ်လို့ဆိုပါတယ်။
