Border News Agency
ကျောက်တော်၊ ဧပြီ ၉ ။
လာမယ့်သင်္ကြန်ကာလအတွင်းမှာ အာရက္ခပြည်သူတွေအလေးအနက်ထားလိုက်နာရမယ့် စည်းကမ်းချက် ၆ ချက်ကို အာရက္ခပြည်သူ့တော်လှန်ရေးအစိုးရက ဧပြီ ၈ ရက်နေ့မှာ ထုတ်ပြန်ပါတယ်။
အဲဒီသတ်မှတ်ထားတဲ့ စည်းကမ်းချက်တွေအရ မြို့ရွာတွေမှာကားတွေနဲ့ လှည့်ပတ်ရေကစားတာ၊ မြို့နယ်ကျော်ပြီး ကားတွေနဲ့ ကခုန်လှည့်လည်တာ၊ လူစုလူဝေးဖြစ်စေမယ့် သင်္ကြန်မဏ္ဍပ်တွေနဲ့ Show ပွဲတွေကျင်းပတာမျိုး မပြုလုပ်ဖို့တားမြစ်ထားပါတယ်။
ဒါ့အပြင်ဘုန်းကြီးကျောင်းတွေမှာ ဥပုသ်သီလဆောက်တည်တာနဲ့ အလှူအတန်းပြုလုပ်တာတွေကိုလည်း လူစုလူဝေးတွေနဲ့ မလုပ်ဖို့အပြင်၊ပတ်ဝန်းကျင်ကို အနှောင့်အယှက်ဖြစ်စေမယ့် ဆောင်းဘောက်တွေကို ဆူညံစွာဖွင့်တာမျိုး မလုပ်ကြဖို့လည်းပါဝင်ပါတယ်။
ဒီစည်းကမ်းချက်တွေကို ပြည်သူ့ဝန်ဆောင်မှုလုပ်ငန်းတွေမှာ ဦးဆောင်နေတဲ့ဌာနဆိုင်ရာတာဝန်ရှိသူတွေကိုယ်တိုင် တသွေမတိမ်းလိုက်နာရမှာဖြစ်သလို ပြည်သူတွေကိုလည်း အခြေအနေအရပ်ရပ်ကို ထောက်ရှုပြီးလိုက်နာကြဖို့ မေတ္တာရပ်ခံရမှာဖြစ်ပါတယ်။
သက်ဆိုင်ရာ တာဝန်ရှိသူတွေအနေနဲ့ ဒီစည်းကမ်းချက်တွေကို ကိုယ်တိုင်လိုက်နာပြီး ပြည်သူတွေလိုက်နာတာ ရှိ၊ မရှိကိုလည်း သေချာစောင့်ကြည့်ကြပ်မတ်သွားမယ်လို့ဆိုပါတယ်။
