Border News Agency
ရန်ကုန်၊ ဧပြီ ၁၆။
စစ်ကော်မရှင်ရဲ့အတင်းအဓမ္မ စစ်မှုထမ်းခိုင်းတာနဲ့ နည်းပညာသုံး ဖိနှိပ်မှုတွေကြောင့် မြန်မာလူငယ်ပေါင်း ၅ သိန်းလောက် နိုင်ငံကနေ ထွက်ခွာသွားခဲ့ရတယ်လို့ သံအမတ်ကြီး ဦးကျော်မိုးထွန်းက ကုလသမဂ္ဂမှာ ပြောကြားလိုက်ပါတယ်။
၅၉ ကြိမ်မြောက် ကုလသမဂ္ဂ လူဦးရေနဲ့ ဖွံ့ဖြိုးတိုးတက်ရေးကော်မရှင်အစည်းအဝေးမှာ သူက အခုလို ထည့်သွင်းပြောဆိုခဲ့တာပါ။
စစ်ကော်မရှင်ဟာ အင်တာနက်ဖြတ်တောက်တာနဲ့ ဝက်ဘ်ဆိုက်တွေကို ပိတ်ဆို့တာတွေလုပ်နေတာကြောင့် လူငယ်တွေရဲ့ ပညာရေးနဲ့ အလုပ်အကိုင်အခွင့်အလမ်းတွေ ဆုံးရှုံးနေရတယ်လို့ဆိုပါတယ်။
ဒီလို အနာဂတ်ပျောက်ဆုံးအောင် လုပ်ဆောင်နေတဲ့အပြင် မတရားစစ်မှုထမ်းခိုင်းတာတွေကြောင့်ပါ လူငယ်တွေ ပြည်ပကိုထွက်ပြေးနေရတာ ဖြစ်ပါတယ်။
ဒါ့အပြင် စစ်ကော်မရှင်ဟာ AI နဲ့ မျက်နှာမှတ်သားတဲ့ နည်းပညာတွေသုံးပြီး CDM တွေနဲ့ တော်လှန်ရေးသမားတွေကို စောင့်ကြည့်ဖမ်းဆီးနေသလို၊ အမျိုးသမီးတွေကိုလည်း အွန်လိုင်းကနေ ကိုယ်ရေးအချက်အလက်တွေဖြန့်ပြီး နှိမ့်ချစော်ကားတာတွေ လုပ်နေတယ်လို့ဆိုပါတယ်။
စစ်ကော်မရှင်မှာ ငြိမ်းချမ်းရေးဖော်ဆောင်ဖို့ ဆန္ဒမရှိဘဲ ဖျက်ဆီးရေးကိုပဲ ရွေးချယ်ထားတာကြောင့် စစ်အာဏာရှင်စနစ် အမြစ်ပြတ်ဖို့ ကြိုးစားနေတဲ့ မြန်မာပြည်သူတွေနဲ့ SCEF ကောင်စီကို ထိရောက်တဲ့ ပံ့ပိုးမှုတွေပေးဖို့ နိုင်ငံတကာကို သံအမတ်ကြီးက တိုက်တွန်းခဲ့ပါတယ်။
