Border News Agency
အိန္ဒိယ၊ဇွန် ၁။
အိန္ဒိယနိုင်ငံခြားရေးဝန်ကြီးဌာနက မင်းအောင်လှိုင်ကို မြန်မာနိုင်ငံတော်ရဲ့ သမ္မတလို့ သုံးနှုန်းခဲ့တာအပေါ် မဟာဗျူဟာညှိနှိုင်းဖော်ဆောင်ရေးအင်အားစု (SIF)က ပြတ်ပြတ်သားသား ကန့်ကွက်ပယ်ချလိုက်ပါတယ်။
အခုလိုသုံးနှုန်းပုံဟာ သံတမန်ရေးရာ ကျင့်ထုံးလုပ်ထုံးတခု မဟုတ်ဘဲအာဏာသိမ်းစစ်တပ်က ကျူးလွန်ခဲ့တဲ့ ရက်စက်ကြမ်းကြုတ်တဲ့ လုပ်ရပ်တွေကို တရားဝင်ဖြစ်အောင် လုပ်ဆောင်ပေးခြင်းသာ ဖြစ်တယ်လို့ SIF က ထောက်ပြထားပါတယ်။
ဒါ့အပြင်အာဏာသိမ်းစစ်တပ်ရဲ့အိန္ဒိယခရီးစဉ်ဟာ တရုတ်နိုင်ငံနဲ့လမ်းခွဲလိုလို့ဆိုတဲ့ လူပြောများတဲ့အယူအဆဟာ မှားယွင်းပြီး လက်ရှိမှာ အိန္ဒိယအစိုးရအနေနဲ့ မျှော်လင့်ချက်မဲ့နေတဲ့ စစ်တပ်အတွက် တရားဝင်မှုဟန်ပြဖြစ်အောင် ကူညီပေးဖို့ တောင်းဆိုခံနေရတာသာ ဖြစ်တယ်လို့ ဆိုပါတယ်။
မင်းအောင်လှိုင်နယူးဒေလီကို တခေါက်သွားရုံနဲ့ မြန်မာနိုင်ငံရဲ့ ဆိုးရွားလှတဲ့ အခြေအနေတွေ ပြောင်းလဲသွားမှာမဟုတ်ဘဲ အခုလို မြေပြင်မှာ လုံးဝမရှိတော့တဲ့ မဟာဗျူဟာမြောက် ပုံရိပ်ကို ဟန်ပြဖန်တီးပေးတာက အိန္ဒိယရဲ့ ဒီမိုကရေစီဂုဏ်သိက္ခာကိုသာ ထိခိုက်စေမှာဖြစ်ပြီး ပြည်သူတွေအတွက်တော့ ဘယ်လိုအကျိုးကျေးဇူးမှ မရှိဘူးလို့ ဆိုပါတယ်။
ကရင်နီ၊ကရင်၊ကချင်၊ မွန်၊ ရခိုင်နဲ့ အခြားလူထုလူတန်းစားအသီးသီးကို ကိုယ်စားပြုတဲ့ အဖွဲ့အစည်း ၂၀ နဲ့ ဖွဲ့စည်းထားတဲ့ SIF အနေနဲ့ အိန္ဒိယနိုင်ငံနဲ့ စစ်မှန်တဲ့ မိတ်ဖက်ဆက်ဆံရေးကိုသာ လိုလားတယ်လို့လည်း ဆိုပါတယ်။
