Border News Agency
ရသေ့တောင်၊ဇွန် ၁။
အာရက္ခဒေသအတွင်းရှိ မြို့နယ် ၉ ခုက ရေသန့်ထုတ်လုပ်နေတဲ့စက်ရုံပေါင်း ၄၆ ရုံကို အာရက္ခပြည်သူ့ကျန်းမာရေးဌာနရဲ့ အစားအသောက်နဲ့ ဆေးဝါးကြီးကြပ်ရေးဌာနခွဲ (FDA) က မေလအတွင်း ကွင်းဆင်းစစ်ဆေးခဲ့ရာမှာ စံချိန်စံညွှန်းမီတဲ့ ရေသန့်စက်ရုံ ၈ ရုံသာရှိပြီး စံမမီတဲ့စက်ရုံ ၃၈ ရုံအထိ ရှိနေတယ်လို့သိရပါတယ်။
အဲဒီစံမီတဲ့ရေသန့်စက်ရုံ ၈ ရုံကတော့ ကျောက်တော်မြို့နယ်က F-5 နဲ့ Water Star၊ မြောက်ဦးမြို့နယ်က Nie နဲ့ King၊မောင်တောမြို့နယ်က KNN၊ ရသေ့တောင်မြို့နယ်က Thant Myat တို့ဖြစ်ပြီး တောင်ကုတ်မြို့နယ်ကတော့ ရွှေပြည်ရခိုင်နဲ့ Zee Zan Taung ရေသန့်စက်ရုံတို့ ဖြစ်ကြပါတယ်။
နောက်ပြီးစံမမီတဲ့ ရေသန့်စက်ရုံ ၃၈ ရုံကတော့ကျောက်တော်မှာ ၁၀ ရုံ၊ မြောက်ဦးမှာ ၈ ရုံ၊မောင်တောနဲ့ မင်းပြားမှာ ၄ ရုံစီ၊ မြေပုံနဲ့ တောင်ကုတ်မှာ ၃ ရုံစီ၊ ဘူးသီးတောင်မှာ ၂ ရုံအပြင် ရသေ့တောင်နဲ့ ရမ်းဗြဲမြို့နယ်တို့မှာ ၁ ရုံစီ တွေ့ရှိခဲ့တာ ဖြစ်ပါတယ်။
အခုလို စံမမီတဲ့ရေသန့်စက်ရုံတွေ များပြားနေရတာဟာ အရင်က အာဏာသိမ်းစစ်တပ်ရဲ့ FDA အနေနဲ့ကွင်းဆင်းစစ်ဆေးမှု အားနည်းခဲ့တာ၊စျေးကွက်အတွင်း စစ်ဆေးမှုကင်းလွတ်တဲ့လုပ်ငန်းတွေ များပြားလာတာနဲ့ လုပ်ငန်းရှင်တွေဘက်က အရည်အသွေးထက် စျေးကွက်ချဲ့ထွင်ဖို့ပဲ အဓိကထားခဲ့ကြတာကြောင့်လို့ FDA တာဝန်ရှိသူက ထောက်ပြထားပါတယ်။
အဲဒီ စံမမီသေးတဲ့ ရေသန့်စက်ရုံတွေကို ပြုပြင်ဖို့အတွက် အချိန် ၆ လ ပေးထားပြီး အဲဒီအတောအတွင်းမှာ စစ်ဆေးမှုတွေ ဆက်လက်ပြုလုပ်သွားမှာ ဖြစ်သလို သတ်မှတ်ကာလအတွင်းပြုပြင်ပြီး စံမီလာရင် စံမီစက်ရုံအဖြစ် ထပ်မံထုတ်ပြန်ပေးသွားမယ်လို့ ဆိုပါတယ်။
ဒါ့အပြင် FDA အနေနဲ့ သောက်သုံးရေသန့် ထုတ်လုပ်သူတွေ လိုက်နာရမယ့် ရေအမျိုးအစား၊အဆောက်အအုံ၊ စက်ပစ္စည်း၊ ရေသန့်ထုတ်လုပ်မှုနဲ့ အရည်အသွေးထိန်းသိမ်းမှု စတဲ့ စည်းကမ်းချက် ၅ ချက်ကို ထုတ်ပြန်ထားပြီး ပြည်သူတွေအနေနဲ့လည်း စံမီတဲ့ ရေသန့်တွေကိုသာ ရွေးချယ်သောက်သုံးကြဖို့ တိုက်တွန်းထားပါတယ်။
