Border News Agency
အစ္စရေး၊ ဧပြီ ၂၂။
အစ္စရေးစစ်တပ်ဟာ ဟစ်ဇ်ဘိုလာအဖွဲ့နဲ့ အပစ်အခတ်ရပ်စဲရေး သဘောတူညီချက်ယူပြီးနောက် လက်ဘနွန်နိုင်ငံအတွင်း သူတို့ရဲ့ တပ်ဖြန့်ထားမှု အခြေအနေပြမြေပုံကို ပထမဆုံးအကြိမ် ထုတ်ပြန်လိုက်ပါတယ်။
အဲဒီမြေပုံအရ လက်ဘနွန်နယ်စပ်ကနေ ၅ ကီလိုမီတာမှ ၁၀ ကီလိုမီတာအထိ အစ္စရေးက သိမ်းပိုက်ထားတာကို တွေ့ရပါတယ်။
အမေရိကန် ကြားဝင်စေ့စပ်ပေးမှုနဲ့ ဧပြီလ ၁၆ ရက်နေ့မှာ အပစ်ရပ်ခဲ့ကြပေမယ့် အစ္စရေးတပ်တွေကတော့ လက်ဘနွန်တောင်ပိုင်းက ကျေးရွာအများစုကို ဆက်လက်ထိန်းချုပ်ထားဆဲပါ။
အစ္စရေးဟာ ဒီဒေသကို ကြားခံနယ်မြေအဖြစ် ဖန်တီးဖို့ စီစဉ်နေပြီး ဟစ်ဇ်ဘိုလာတွေ အခြေမချနိုင်အောင် နယ်စပ်က နေအိမ်တွေကိုလည်း ဖျက်ဆီးခဲ့ပါတယ်။
အစ္စရေးစစ်တပ်ဟာ ရေတပ်အပြင် တပ်မငါးခုကို တပြိုင်နက်တည်း ဖြန့်ကြက်ထားပြီး ဟစ်ဇ်ဘိုလာရဲ့ အခြေခံအဆောက်အအုံတွေကို ရှင်းလင်းနေပါတယ်။
အစ္စရေးကာကွယ်ရေးဝန်ကြီးကလည်းသူတို့စစ်သားတွေကို အန္တရာယ်ပေးနိုင်တဲ့ အဆောက်အအုံနဲ့ လမ်းမှန်သမျှကို ချက်ချင်းဖျက်ဆီးဖို့ ညွှန်ကြားထားတာပါ။
ဒီအပစ်ရပ်စဲရေးဟာ အမေရိကန်နဲ့ အီရန်ကြား ပိုမိုကျယ်ပြန့်တဲ့ ဆွေးနွေးမှုတွေ ဖြစ်လာဖို့ ရည်ရွယ်ထားတာဖြစ်ပါတယ်။
ဒါပေမယ့် အစ္စရေးဘက်ကတော့ သူတို့မြောက်ပိုင်းမြို့တွေကို ကာကွယ်ဖို့အတွက် လက်ဘနွန်တောင်ဘက်အတွင်းပိုင်းအထိ ဆက်လက်တပ်စွဲထားဦးမှာ ဖြစ်ပါတယ်။
