Border News Agency
စစ်ကိုင်း၊ မေ ၃။
အာဏာသိမ်း ၅ နှစ်တာကာလအတွင်းစစ်တပ်လေကြောင်းတိုက်ခိုက်လို့ ကလေးငယ် ၇၄၀ အပါအဝင် ပြည်သူ ၅,၆၀၀ ကျော်သေဆုံးခဲ့တယ်လို့ လူ့အခွင့်အရေးဆိုင်ရာဝန်ကြီးဌာန (MOHR) က ထုတ်ပြန်ပါတယ်။
အာဏာသိမ်းစစ်တပ်ဟာ နိုင်ငံတကာကို လိမ်ညာဖို့အစိုးရအတုပုံဖော်နေပေမယ့် တဖက်မှာတော့ ပြည်သူတွေအပေါ် လေကြောင်းကနေ ၅,၃၉၅ ကြိမ်တောင်တိုက်ခိုက်ခဲ့တာဖြစ်ပြီး စာသင်ကျောင်းနဲ့ ဆေးရုံပေါင်း ၁,၃၉၂ ခုကိုလည်း ရည်ရွယ်ချက်ရှိရှိ ဖျက်ဆီးခဲ့တယ်လို့ ဆိုပါတယ်။
ဒါ့အပြင် အာဏာသိမ်းစစ်တပ်ဟာ တနိုင်ငံလုံးကလူငယ် ၃၂,၀၀၀ ကျော်ကို အဓမ္မစစ်ထဲဆွဲသွင်းနေပြီး စစ်ကိုင်းတိုင်းဟာ လူ့အခွင့်အရေး ချိုးဖောက်ခံရမှု အဆိုးရွားဆုံးဒေသအဖြစ်ဆက်ရှိနေကြောင်း ဧပြီလ ၃၀ ရက်နေ့အထိ ကောက်ယူရရှိထားတဲ့ အချက်အလက်တွေအရ သိရပါတယ်။
ခုရှိအချိန်ထိ တနိုင်ငံလုံးမှာ လူ့အခွင့်အရေးချိုးဖောက်မှုပေါင်း ၂၅,၀၀၀ ကျော်ကို မှတ်တမ်းတင်ထားနိုင်ပြီး ကျူးလွန်သူတွေကို အရေးယူနိုင်ဖို့ ဆက်လက်ဆောင်ရွက်သွားမယ်လို့ MOHR က ဆိုပါတယ်။
