Border News Agency
အမေရိကန်၊ မေ ၃။
အမေရိကန်အစိုးရက ဂျာမနီနိုင်ငံမှာအခြေစိုက်ထားတဲ့ သူတို့ရဲ့တပ်ဖွဲ့ဝင်အင်အား ၅,၀၀၀ ခန့်ကို လာမယ့် ၆ လမှ ၁၂ လအတွင်း ပြန်လည်ရုပ်သိမ်းသွားမယ်လို့ ထုတ်ပြန်လိုက်ပါတယ်။
အဲဒီဆုံးဖြတ်ချက်ဟာ အမေရိကန်-အစ္စရေးနဲ့ အီရန်တို့ကြား ဖြစ်ပွားနေတဲ့ စစ်ပွဲမှာ ဥရောပမဟာမိတ်တွေဘက်က ပူးပေါင်းပါဝင်မှုအားနည်းတယ်ဆိုပြီး သမ္မတ ဒေါ်နယ်ထရမ့်နဲ့ ဥရောပခေါင်းဆောင်တွေကြား တင်းမာမှုတွေ ဖြစ်ပေါ်နေချိန်မှာ ထွက်ပေါ်လာတာပါ။
ဂျာမနီဝန်ကြီးချုပ်ဖရိုင်းဒရစ်မာ့ဇ်နဲ့ သမ္မတထရမ့်တို့ကြား အီရန်စစ်ပွဲအပေါ် သဘောထားကွဲလွဲမှုတွေ ရှိနေပြီး အမေရိကန်ဘက်က ဂျာမနီထုတ်မော်တော်ကားတွေအပေါ် အခွန်တိုးမြှင့်ဖို့အထိ စီစဉ်နေပါတယ်။
နေတိုးအဖွဲ့ကတော့ အမေရိကန်ရဲ့တပ်ရုပ်သိမ်းမယ့်အသေးစိတ်အချက်အလက်တွေကိုလေ့လာနေပြီး ဥရောပနိုင်ငံတွေအနေနဲ့ ကိုယ့်လုံခြုံရေးအတွက်ကိုယ်တိုင်ပိုမိုရင်းနှီးမြှုပ်နှံဖို့ လိုအပ်လာပြီလို့ ပြောဆိုထားပါတယ်။
ဂျာမနီကာကွယ်ရေးဝန်ကြီးကတော့ အခုလိုတပ်ရုပ်သိမ်းမှုကို ကြိုတင်ခန့်မှန်းထားပြီးသားဖြစ်ကာ ဂျာမနီစစ်တပ်ကို တိုးချဲ့တာနဲ့ စစ်လက်နက်ပစ္စည်းအဆင့်မြှင့်တင်တာတွေကို ဆက်လက်လုပ်ဆောင်သွားမယ်လို့ တုံ့ပြန်ထားပါတယ်။
