Border News Agency
ထိုင်း၊ မေ ၅။
ထိုင်းနိုင်ငံမြောက်ပိုင်း၊ ချင်းရိုင်ခရိုင်၊ ချင်းသန့်မြို့နယ်အတွင်းမှာရှိတဲ့ မဲခေါင်မြစ်ကမ်းဘေးနယ်စပ်ဖြတ်ကျော်နေရာတခုမှာ တရားမဝင်သယ်ဆောင်လာတဲ့ စိတ်ကြွဆေးပြားလေးသန်းခန့်ကို ထိုင်းအာဏာပိုင်တွေက ဖမ်းဆီးရမိခဲ့တယ်လို့သိရပါတယ်။
အဲဒီဖမ်းဆီးမှုကို မေလ ၃ ရက်နေ့ ညပိုင်းမှာ မဲခေါင်မြစ်ကြောင်းလုံခြုံရေးတပ်ဖွဲ့နဲ့ မူးယစ်ဆေးဝါးတားဆီးနှိမ်နင်းရေးအဖွဲ့တွေပူးပေါင်းပြီး ကင်းလှည့်စစ်ဆေးနေတုန်း ဘန်ဆဲဝ်ကျေးရွာအနီးမှာ ရှာဖွေတွေ့ရှိခဲ့တာ ဖြစ်ပါတယ်။
အဲဒီစိတ်ကြွဆေးပြားတွေကို ဆာလာအိတ်ဆယ့်လေးအိတ်ထဲမှာ စနစ်တကျထည့်သွင်းသယ်ဆောင်လာတာဖြစ်ပြီး စုစုပေါင်းဆေးပြားလေးသန်းခန့်ရှိကာ လက်ကိုင်ဖုန်းတလုံးကိုလည်း သက်သေခံပစ္စည်းအဖြစ် သိမ်းဆည်းရမိခဲ့ပါတယ်။
အဲဒီအပြင်ဖာမိန်းတပ်ဖွဲ့ရဲ့တပ်မှူး ဗိုလ်ချုပ်သာတစ်ဝိုင်နွန်နဲ့တာဝန်ရှိသူတွေဟာ ဖမ်းဆီးရမိတဲ့မူးယစ်ဆေးဝါးတွေကို သွားရောက်စစ်ဆေးခဲ့ပြီး သတင်းစာရှင်းလင်းပွဲပြုလုပ်ခဲ့ပါတယ်။
အဲဒီသိမ်းဆည်းရမိတဲ့ မူးယစ်ဆေးဝါးအားလုံးကို ဥပဒေအရ ဆက်လက်အရေးယူနိုင်ဖို့အတွက် ချင်းသန့်မြို့နယ်ရဲစခန်းကို လွှဲပြောင်းပေးထားပြီး ဒီဆေးပြားတွေဟာ ဘယ်ကနေဝင်လာသလဲဆိုတာကိုလည်း ဆက်လက်စုံစမ်းနေတယ်လို့သိရပါတယ်။
