Border News Agency
ထိုင်း၊မေ ၉။
ထိုင်းနိုင်ငံ၊ချာချိုဆောင်ဘက်က လင်းနို့တွေဆီမှာ ကိုရိုနာဗိုင်းရပ်စ် မျိုးစိတ်သစ်တခုကို ရှာဖွေတွေ့ရှိခဲ့တယ်လို့ ထိုင်းနဲ့ ဂျပန်သုတေသီတွေကအသိပေးထားပါတယ်။
အခုတွေ့ရတဲ့ ဗိုင်းရပ်စ်ဟာ ကိုဗစ်-၁၉ (SARS-CoV-2) နဲ့ မျိုးရိုးဗီဇဆင်တူတာကို တွေ့ရတယ်လို့ဆိုပါတယ်။
ဒါပေမယ့် ဒီဗိုင်းရပ်စ်သစ်ဟာလူ့ဆဲလ်တွေထဲမှာ ပွားများမှုအလွန်နှေးကွေးတာကြောင့် လက်ရှိမှာစိုးရိမ်စရာ မရှိသေးဘူးလို့ဆိုပါတယ်။
ကြွက်တွေနဲ့ စမ်းသပ်ကြည့်ရာမှာလည်း ရောဂါလက္ခဏာ မပြသလို တိရစ္ဆာန်အချင်းချင်း ကူးစက်တာမျိုးလည်း မတွေ့ရဘဲ အခုသုံးနေတဲ့ ကာကွယ်ဆေးတွေကလည်း ဒီဗိုင်းရပ်စ်အပေါ်မှာ ထိရောက်မှု ရှိနေဆဲ ဖြစ်ပါတယ်။
ပညာရှင်တွေရဲ့ လေ့လာချက်အရ ဒီဗိုင်းရပ်စ်ဟာ တရုတ်ပြည် ယူနန်ပြည်နယ်နဲ့ လာအိုမြောက်ပိုင်းက လင်းနို့တွေ ရွှေ့ပြောင်းသွားလာရာကနေတဆင့် ထိုင်းနိုင်ငံထဲကို ရောက်ရှိလာတာ ဖြစ်နိုင်တယ်လို့ တွက်ဆထားကြပါတယ်။
အခုဗိုင်းရပ်စ်ဟာ လူသားတွေအတွက် ချက်ချင်းအန္တရာယ်ပေးနိုင်တဲ့ အခြေအနေမျိုး မရှိသေးပေမယ့် နောင်တချိန်မှာ ဗီဇပြောင်းပြီး အန္တရာယ်ဖြစ်မလာအောင် ဆက်လက်စောင့်ကြည့်သွားဖို့ အရေးကြီးတယ်လို့ သတိပေးထားပါတယ်။
ဒါကြောင့် ပြည်သူတွေအနေနဲ့ လက်ရှိမှာ ထိတ်လန့်စရာ မလိုသေးပေမယ့် တောရိုင်းတိရစ္ဆာန်တွေနဲ့ နီးစပ်မှုရှိတဲ့နေရာတွေမှာ နေထိုင်သူတွေအနေနဲ့ ကျန်းမာရေးသတိ ဆက်ရှိနေတိုက်တွန်းထားပါတယ်။
