Border News Agency
အီရန်၊မေ ၁၈။
အီရန်နိုင်ငံကကမ္ဘာ့အရေးပါဆုံး ရေကြောင်းလမ်းဖြစ်တဲ့ ဟောမုဇ်ရေလက်ကြားကို ဖြတ်သန်းမယ့် သင်္ဘောတွေဆီကနေ အခွန်ကောက်ခံမယ့် စနစ်နဲ့ လမ်းကြောင်းသစ် အစီအစဉ်ကို မကြာခင် ထုတ်ပြန်တော့မယ်လို့ ပြောလိုက်ပါတယ်။
အီရန်ဒုသမ္မတကလည်း ရန်သူ့စစ်လက်နက်ပစ္စည်းတွေ ဖြတ်သန်းခွင့်ကို ပိတ်ပင်တော့မှာဖြစ်ပြီး အီရန်နဲ့ ပူးပေါင်းတဲ့ ကုန်သွယ်ရေးသင်္ဘောတွေကိုပဲ ဖြတ်သန်းခွင့်ပေးမယ်လို့ ဆိုပါတယ်။
လောလောဆယ်မှာ တရုတ်၊ ဂျပန်၊ ပါကစ္စတန်အပြင် ဥရောပနိုင်ငံတွေကပါ သင်္ဘောတွေ ဖြတ်သန်းနိုင်ဖို့ အီရန်တော်လှန်ရေးအစောင့်တပ်ဖွဲ့နဲ့ ဆွေးနွေးနေကြပြီလို့ အီရန်အစိုးရရုပ်သံက ထုတ်ပြန်ထားပါတယ်။
တဖက်မှာလည်း အမေရိကန်သမ္မတ ဒေါ်နယ်ထရမ့်က ငြိမ်းချမ်းရေးသဘောတူညီချက် အမြန်မရရင် အီရန်အနေနဲ့ တော်တော်လေး ဆိုးရွားတဲ့ အခြေအနေကြုံရမယ်လို့ ထပ်မံသတိပေးထားပြီး လက်ရှိရပ်တန့်နေတဲ့ အမေရိကန်-အီရန် ငြိမ်းချမ်းရေးဆွေးနွေးပွဲကို ကြားဝင်ညှိနှိုင်းပေးဖို့ ပါကစ္စတန် ပြည်ထဲရေးဝန်ကြီးဟာ အီရန်နိုင်ငံ တီဟီရန်မြို့တော်ကိုမေလ ၁၆ ရက်နေ့ကရောက်ရှိလာပါတယ်။
စစ်ပွဲအတွင်း အမေရိကန်စစ်တပ်က အီရန်ဆိပ်ကမ်းတွေကို ပိတ်ဆို့ထားရာမှာ ကုန်သွယ်ရေးသင်္ဘော ၇၈ စီးကို လမ်းကြောင်းလွှဲခိုင်းခဲ့ပြီး သင်္ဘော ၄ စီးကို သွားလာမရအောင် လုပ်ဆောင်ထားတယ်လို့ သိရပါတယ်။
စစ်ပွဲရဲ့နောက်ဆက်တွဲအနေနဲ့ အစ္စရေးနိုင်ငံဟာ လက်ဘနွန်တောင်ပိုင်းကို ဆက်လက်ဗုံးကြဲတိုက်ခိုက်နေပြီး ပြီးခဲ့တဲ့ နှစ်ရက်အတွင်း နေရာပေါင်း ၁၀၀ ကျော်ကို တိုက်ခိုက်ခဲ့ပါတယ်။
ဒါဟာ အစ္စရေးနဲ့ ဟစ်ဇဘိုလာတို့အကြား ယာယီအပစ်အခတ်ရပ်စဲရေးကို နောက်ထပ် ၄၅ ရက် သက်တမ်းတိုးဖို့ ဝါရှင်တန်ဒီစီမှာ သဘောတူညီခဲ့ပြီးနောက်ပိုင်း ထပ်မံတိုက်ခိုက်ခဲ့တာ ဖြစ်ပါတယ်။
လတ်တလော စစ်ပွဲအရှိန်မြင့်လာတဲ့ မတ်လကတည်းက စတင်တွက်ချက်ရင် လက်ဘနွန်တောင်ပိုင်း တိုက်ပွဲတွေအတွင်း အစ္စရေးစစ်သား ၂၁ ဦး သေဆုံးခဲ့ပြီဖြစ်ကြောင်း အစ္စရေးစစ်တပ်က အတည်ပြုထားပါတယ်။
