Border News Agency
အိန္ဒိယ၊ မေ ၃၀။
အိန္ဒိယနိုင်ငံအနေနဲ့ အာဏာသိမ်းစစ်တပ်ကကျူးလွန်နေတဲ့ နိုင်ငံတကာရာဇဝတ်မှုတွေမှာ ကြံရာပါအဖြစ် ပါဝင်ပတ်သက်နေမှုကို ချက်ချင်းရပ်တန့်ဖို့ Justice For Myanmar (JFM) က တောင်းဆိုလိုက်ပါတယ်။
အခုသွားရောက်တဲ့ သမ္မတတုမင်းအောင်လှိုင်ရဲ့ ဒေလီခရီးစဉ်ဟာ အိန္ဒိယအစိုးရရဲ့ ပိုမိုနက်ရှိုင်းလာတဲ့ ကြံရာပါပတ်သက်မှုပုံစံတရပ်ပဲဖြစ်ပြီး အာဏာသိမ်းစစ်တပ်က အရပ်သားတွေကိုသတ်ဖြတ်ကာ နေရပ်စွန့်ခွာထွက်ပြေးအောင်လုပ်ဆောင်နေချိန်မှာ အိန္ဒိယဘက်ကစစ်လက်နက်တွေ၊ စစ်သုံးပစ္စည်းတွေနဲ့ စစ်သင်တန်းတွေကို ဆက်လက်ပံ့ပိုးပေးနေတာဖြစ်ပါတယ်။
ဒါ့အပြင်အိန္ဒိယဟာ ရွှေသဘာဝဓာတ်ငွေ့စီမံကိန်းနဲ့ မြန်မာ – တရုတ် ရေနံနဲ့ သဘာဝဓာတ်ငွေ့ပိုက်လိုင်းစီမံကိန်းတွေမှာရှိတဲ့ သူတို့ရဲ့ နိုင်ငံပိုင်ရင်းနှီးမြှုပ်နှံမှုတွေကတဆင့် အာဏာသိမ်းစစ်တပ်အတွက် အကျိုးအမြတ်တွေရစေမယ့် နိုင်ငံခြားဝင်ငွေရင်းမြစ်တွေကို ထောက်ပံ့ပေးနေတာလို့ဆိုပါတယ်။
အခုလိုရှုတ်ချဖွယ်ကောင်းတဲ့ခရီးစဉ်တွေကတဆင့် အိန္ဒိယအစိုးရဟာ မြန်မာပြည်သူတွေ သက်စွန့်ဆံဖျားဆန့်ကျင်တော်လှန်ပြီး ငြင်းပယ်ထားတဲ့ အာဏာသိမ်းစစ်တပ်ကို မမှန်ကန်တဲ့တရားဝင်မှုတရပ် ပေးအပ်ရာရောက်နေတယ်လို့ဆိုပါတယ်။
အိန္ဒိယလေတပ်နဲ့ အစိုးရပိုင်လုပ်ငန်းတွေ (PSUs)က အာဏာသိမ်းစစ်တပ်ရဲ့ စစ်ရာဇဝတ်မှုတွေကို ဘယ်လိုအားပေးကူညီနေလဲဆိုတာနဲ့ ပတ်သက်ပြီး ပြီးခဲ့တဲ့ ၂၀၂၄ ခုနှစ်အတွင်းက JFM ရဲ့ သုတေသနအစီရင်ခံစာတရပ်မှာလည်း အသေးစိတ်ဖော်ထုတ်ထားခဲ့တယ်လို့ဆိုပါတယ်။
