Border News Agency
ဘန်ကောက်၊ ဇွန်၁၃။
ထိုင်းနိုင်ငံ၊ ဘန်ကောက်မြို့၊ Ratchathewi နယ်မြေရှိ တိုက်ခန်းတခုမှာ မြန်မာအမျိုးသမီးတဦးရဲ့ ရုပ်အလောင်းကို အပိုင်းပိုင်းခုတ်ထစ်ကာ ပလတ်စတစ်ပုံးထဲ ထည့်ထားတာကို ဇွန်လ ၁၂ ရက်နေ့၊ မနက်ပိုင်းက ရဲတပ်ဖွဲ့ကရှာဖွေတွေ့ရှိခဲ့ပါတယ်။
အဲဒီ သေဆုံးသူဟာ Khlong Toei နယ်မြေရှိ စားသောက်ဆိုင်တဆိုင်မှာ စားပွဲထိုးလုပ်ကိုင်နေတဲ့ အသက် ၃၄ နှစ်အရွယ် မြန်မာအမျိုးသမီးတဦးဖြစ်တယ်လို့ သိရပါတယ်။
အခန်းတွင်းမှာ ပုပ်အဲ့အဲ့အနံ့အသက်တွေထွက်ပေါ်လာတာကြောင့် အိမ်ရှင်နဲ့မန်နေဂျာတို့က အခန်းကိုဝင်ရောက်စစ်ဆေးခဲ့ရာ လသာဆောင်ပေါ်ရှိ အနက်ရောင်ပလတ်စတစ်ပုံးအတွင်းမှ အလောင်းကိုတွေ့ရှိခဲ့ရတာဖြစ်ပါတယ်။
အဲဒီအလောင်းမှာ ခေါင်း၊ လက်၊ခြေထောက်တွေ ဖြတ်တောက်ခံထားရပြီး ဝမ်းဗိုက်ပါပွင့်ထွက်နေကာ သေဆုံးသူဟာရက်အနည်းငယ်ခန့် ကြာမြင့်နေပြီလို့ ရဲတပ်ဖွဲ့က ခန့်မှန်းထားပါတယ်။
အဲဒီသေဆုံးသူရဲ့ခင်ပွန်းဖြစ်သူကို အဓိကတရားခံအဖြစ်သံသယရှိနေပြီး ရဲတပ်ဖွဲ့ကအရေးပေါ် လိုက်လံရှာဖွေနေပါတယ်။
ခင်ပွန်းဖြစ်သူဟာ Phetchaburi လမ်းမပေါ်ရှိ နာမည်ကြီး Pub တခုမှာ ထမင်းချက်လုပ်ကိုင်သူဖြစ်ပြီး အခင်းဖြစ်ပွားပြီးနောက်ပိုင်းမှာ ပျောက်ဆုံးနေတယ်လို့ သိရပါတယ်။
ရဲတပ်ဖွဲ့ရဲ့ကနဦးစုံစမ်းချက်အရ အိမ်ထောင်ရေးဖောက်ပြန်မှုနဲ့ပတ်သက်ပြီး သဝန်တိုရာမှတဆင့် ခုလိုရက်ရက်စက်စက် သတ်ဖြတ်မှုဖြစ်ပွားခဲ့တာလို့ သုံးသပ်ထားပါတယ်။
