Border News Agency
ဆွစ်ဇာလန်၊ဇွန် ၂၁။
အမေရိကန်နဲ့ အီရန်တို့အကြား စစ်ပွဲရပ်ဖို့ ချုပ်ဆိုထားတဲ့ သဘောတူညီချက်တွေ အသက်ဝင်လာအောင် ဆွစ်ဇာလန်နိုင်ငံ၊ ဘူဂန်စတော့မြို့မှာ ဇွန်လ ၂၁ ရက်၊ဒီနေ့ နေလည်ကစပြီး အဆင့်မြင့်ဆွေးနွေးပွဲတွေ စတင်လုပ်ဆောင်နေပြီဖြစ်ပါတယ်။
အဲဒီဆွေးနွေးပွဲမှာ အမေရိကန်ဘက်က ဒုသမ္မတဂျေဒီဗန့်စ် ဦးဆောင်တဲ့အဖွဲ့နဲ့ အီရန်ဘက်က လွှတ်တော်ဥက္ကဋ္ဌ ဂါလီဘာဖ်နဲ့ နိုင်ငံခြားရေးဝန်ကြီး အာရက်ချီတို့ ဦးဆောင်တဲ့အဖွဲ့တွေ ပါဝင်ပါတယ်။
ပါကစ္စတန်နဲ့ ကာတာနိုင်ငံတို့ကလည်း ကြားဝင်စေ့စပ်ပေးနေတာပါ။
လက်ရှိမှာအဓိကဆွေးနွေးနေတဲ့အချက်ကတော့ လက်ဘနွန်နိုင်ငံမှာ အစ္စရေးရဲ့ တိုက်ခိုက်မှုတွေကြောင့် ပျက်ပြားနေတဲ့ အပစ်အခတ်ရပ်စဲရေးကို အသက်ပြန်သွင်းဖို့နဲ့ အီရန်ရဲ့ နျူကလီးယားအစီအစဉ်ကိစ္စတွေ ဖြစ်ပါတယ်။
အီရန်ဘက်ကတော့ သဘောတူညီချက်မှာပါတဲ့အတိုင်း အမေရိကန်ဘက်က စီးပွားရေးပိတ်ဆို့မှုတွေ ရုပ်သိမ်းပေးဖို့နဲ့ အေးခဲထားတဲ့ အီရန်ငွေကြေးတွေကို ပြန်လွှတ်ပေးဖို့ အပြင်းအထန် တောင်းဆိုထားပါတယ်။
သမ္မတ ပီဇက်ရှ်ခီယန်ကတော့ ကာတာမှာ အေးခဲထားတဲ့ အီရန်ငွေ ဒေါ်လာ ၆ ဘီလီယံ ပြန်ရတော့မှာဖြစ်ပြီး အမေရိကန်ရဲ့ တော
င်းဆိုချက်ဖြစ်တဲ့ နျူကလီးယားလက်နက် မထုတ်လုပ်ရေးကိုလည်း သဘောတူညီထားပြီလို့ဆိုပါတယ်။
ဒါပေမယ့် အစ္စရေးကတော့ ဒီသဘောတူညီချက်မှာပါဝင်သူမဟုတ်ဘဲ လက်ဘနွန်မှာ စစ်ဆင်ရေးတွေ ဆက်လုပ်နေတာကြောင့် အခြေအနေကတော့ တင်းမာနေဆဲပါပဲ။
ဟော်မုဇ်ရေလက်ကြားအရေးနဲ့ ပတ်သက်ပြီးလည်း အီရန်က ဖြတ်သန်းခွင့်ကြေး ကောက်ခံဖို့ စီစဉ်နေတာကြောင့် ပင်လယ်ကွေ့နိုင်ငံတွေကြားမှာ စိုးရိမ်မှုတွေ ရှိနေပါသေးတယ်။
လက်ရှိအချိန်မှာတော့ အမေရိကန်စစ်တပ်က ဟော်မုဇ်ရေလက်ကြားကို သင်္ဘောတွေ ပုံမှန်ဖြတ်သန်းနေဆဲဖြစ်ပြီး အေးအေးဆေးဆေးပဲလို့ တုံ့ပြန်ထားပါတယ်။
အဲဒီဆွေးနွေးပွဲရဲ့ ရလဒ်တွေကတော့ ကမ္ဘာ့လောင်စာဆီဈေးကွက်နဲ့ စီးပွားရေးအတွက် အလွန်အရေးပါနေတာ ဖြစ်ပါတယ်။
