Border News Agency
ဗင်နီဇွဲလား၊ဇူလိုင် ၁။
ပြီးခဲ့တဲ့သီတင်းပတ်ကပြင်းထန်တဲ့ငလျင်ဒဏ်နှစ်ကြိမ်ဆင့်ခံခဲ့ရတဲ့ ဗင်နီဇွဲလားနိုင်ငံရဲ့ ကယ်ဆယ်ရေးလုပ်ငန်းတွေကို ကူညီပံ့ပိုးဖို့အတွက် အမေရိကန်စစ်တပ်က တပ်ဖွဲ့ဝင် ၉၀၀ ကျော်ကို ဗင်နီဇွဲလားနိုင်ငံထဲ စေလွှတ်ထားတယ်လို့ရိုက်တာသတင်းမှာ ဖော်ပြပါတယ်။
အဲဒီအပြင် ကာရစ်ဘီယံဒေသတွင်း အခြေစိုက်စခန်းတွေဖြစ်တဲ့ ပွာတိုရီကိုနဲ့ ကူရာကာအိုတို့မှာလည်း နောက်ထပ် အမေရိကန်တပ်ဖွဲ့ဝင် ၈၀၀ ခန့်ကို အသင့်ပြင်ဆင်ထားတယ်လို့ လက်တင်အမေရိကဆိုင်ရာ အမေရိကန်ထိပ်တန်းဗိုလ်ချုပ်ကြီး ဖရန်စစ်ဒိုနိုဗန်က ပြောကြားခဲ့ပါတယ်။
အမေရိကန်စစ်တပ်ဟာ ပျက်စီးသွားတဲ့ လေဆိပ်ကို ပြန်လည်လည်ပတ်နိုင်အောင် ကူညီပေးတာ၊ရှာဖွေကယ်ဆယ်ရေးလုပ်ငန်းတွေမှာ ပါဝင်တာအပြင် လူသားချင်းစာနာထောက်ထားမှုဆိုင်ရာ ကူညီမှုတွေ ဝင်ရောက်နိုင်ဖို့ လေကြောင်းနဲ့ ရေကြောင်းအင်အားတွေကိုပါ အသုံးပြုပြီး ကူညီပေးနေတာ ဖြစ်ပါတယ်။
အဲဒီအပြင် မြေပြင်ကအခြေအနေတွေကို ပိုမိုရှင်းလင်းစွာ မြင်တွေ့နိုင်ဖို့အတွက် အမေရိကန်စစ်တပ်က MQ-9 Reaper ဒရုန်း လေး၊ ငါးစင်းခန့်ကိုပါ ဗင်နီဇွဲလား ဝေဟင်မှာ ပျံသန်းပြီး ပျက်စီးသွားတဲ့ လမ်းကြောင်းတွေနဲ့ အဆောက်အအုံတွေကို ထောက်လှမ်းကူညီပေးနေတယ်လို့ သိရပါတယ်။
ဗင်နီဇွဲလားနိုင်ငံဟာ ပြီးခဲ့တဲ့ ဇွန်လ ၂၄ ရက်နေ့က ပြင်းအား ရစ်ခ်တာစကေး ၇.၂ နဲ့ ၇.၅ ရှိတဲ့ ငလျင်ကြီးနှစ်ခု တမိနစ်အတွင်း ဆက်တိုက်လှုပ်ခတ်ခဲ့တာကြောင့် မြို့တော်ကရာကတ်အပါအဝင် ဒေသအများအပြားမှာ လူဦးရေ ၁,၇၀၀ ကျော် သေဆုံးပြီး အဆောက်အအုံများစွာ ပြိုကျပျက်စီးကာ အမျိုးသားရေးအရေးပေါ်အခြေအနေနဲ့ ရင်ဆိုင်နေရတာ ဖြစ်ပါတယ်။
